ఈ మౌనమేంటి క్రిష్?

టాలీవుడ్ దర్శకుల్లో క్రిష్ శైలి చాలా ప్రత్యేకం. రెగ్యులర్ కమర్షియల్ సినిమాకు దూరంగా చిన్న హీరోతో చేసినా పెద్ద స్టార్ తో ప్రాజెక్ట్ కుదిరినా తన పంధా వీడకుండా విభిన్నమైన ఫార్ములాతో తీసి మెప్పించడంలో అతని ప్రత్యేకతే వేరు. అందుకే ఎన్టీఆర్ బయోపిక్ లాంటి ప్రతిష్టాత్మక ప్రాజెక్ట్ కోసం బాలయ్య ఏరికోరి మరీ ముందు అనుకున్న దర్శకుడిని కాదని క్రిష్ ని తీసుకొచ్చాడు. ఒక పక్క రెండు భాగాల షూటింగ్ ఎలాంటి ఆటంకాలు లేకుండా సాగిపోతోంది. మరోపక్క క్రిష్ దర్శకత్వం వహించిన మరో భారీ మూవీ మణికర్ణిక బాలన్స్ షూటింగ్ తో పాటు పోస్ట్ ప్రొడక్షన్ లో బిజీగా ఉంది.

కొద్దిరోజుల క్రితం విడుదల చేసిన టీజర్ కు బ్రహ్మాండమైన రెస్పాన్స్ వచ్చింది. కంగనా లుక్స్ కన్నా క్రిష్ టేకింగ్ మీదే ఎక్కువ ప్రశంశల జల్లులు కురిశాయి. ఒకే దర్శకుడి మూడు క్రేజీ సినిమాలు విడుదల అవుతున్నాయని అభిమానులతో పాటు సినిమా ప్రేమికులు సంబరపడుతున్న తరుణంలో కంగనా రౌనత్ షాక్ ఇవ్వబోతున్నట్టు సమాచారం. ఫైనల్ ఎడిటింగ్ పూర్తయ్యాక సెన్సార్ కు వెళ్లబోయే కాపీలో దర్శకుడి పేరు మారనున్నట్టు సమాచారం. క్రిష్ పేరు పూర్తిగా తీసేయబోవడం లేదు.

కానీ కంగనా తన పేరు వేసుకుని అసిస్టెంట్ డైరెక్టర్ గానో లేక డైరెక్షన్ సూపర్ విజన్ పేరుతోనో క్రిష్ ప్రాధాన్యం తగ్గించబోతున్నట్టు బాలీవుడ్ మీడియా టాక్. అదే జరిగితే ఇది ఖండించాల్సిన విషయమే. ట్రైలర్ లో ఉన్న దర్శకుడు ఫైనల్ కాపీలో మారడం సమర్ధనీయం కాదు. మరి ఇది ఎంత వరకు నిజమో మరికొద్ది రోజుల్లో తెలుస్తుంది. మరో థియేట్రికల్ ట్రైలర్ విడుదల కావాల్సి ఉంది కాబట్టి అప్పుడు క్లారిటీ రావొచ్చు. ఈ లోపు క్రిష్ దీని గురించి ఒసారైనా స్పందిస్తే బెటర్.