లారెన్స్ 'కాంచ‌న 3' క‌థ లీక్

కాంచ‌న సిరీస్ లారెన్స్ మాస్టార్ ద‌ర్శ‌క‌త్వ ప్ర‌తిభ‌కు నిద‌ర్శ‌నంగా నిలిచిన సంగ‌తి తెలిసిందే. వ‌రుస హిట్ల‌తో మోతెక్కించాడు కొరియోగ్రాఫ‌ర్ ట‌ర్న్ డ్ డైరెక్ట‌ర్. అయితే అత‌డి ప‌ప్పులు ప్ర‌తిసారీ ఉడికేస్తాయా?  చాలా గ్యాప్ త‌ర్వాత `కాంచ‌న 3` అంటూ మ‌రో హార‌ర్ చిత్రంతో తెలుగు ప్రేక్ష‌కుల ముందుకు వ‌స్తున్నాడు. ఈ సినిమా కాంచ‌న 2 లా హిట్ట‌వుతుందా? అంటూ ఆస‌క్తికర చ‌ర్చ సాగుతోంది. కాంచ‌న 2 చిత్రాన్ని సూప‌ర్ స్టార్ ర‌జ‌నీకాంత్ అంత‌టివారే ప్ర‌శంసించారు. అందుకే ఇప్పుడు ఈ ఫ్రాంఛైజీలో మూడో సినిమాపైనా త‌మిళ‌నాట అంచ‌నాలేర్ప‌డ్డాయ‌ని చెబుతున్నారు. అయితే తెలుగులో స‌న్నివేశ‌మేంటి? అంటే ఇటీవ‌ల రిలీజైన టీజ‌ర్- ట్రైల‌ర్‌ కి ఏమంత పెద్ద బ్లాక్ బ‌స్ట‌ర్ టాక్ ఏమీ వినిపించ‌లేదు. లారెన్స్ నుంచి వ‌స్తున్న మ‌రో మాస్ హార‌ర్ ట్రీట్ అంటూ మాట్లాడుకున్నారు.

అయితే ఈ సినిమాని ఇప్ప‌టికే వీక్షించిన వాళ్లు ఏమ‌ని చెబుతున్నారు? అంటే.. కాంచ‌న 3లో కొన్ని గ‌గుర్పొడిచే హైలైట్స్ ఉన్నాయి. వీటిలో మాస్ కి క‌నెక్ట‌య్యే కామెడీ.. యాక్ష‌న్ తో పాటు హార‌ర్.. సెంటిమెంట్ ఎలిమెంట్స్ ప్ర‌త్యేకంగా అల‌రిస్తాయ‌ని చెబుతున్నారు. విజువ‌ల్ గ్రాఫిక్స్ కి ఈ చిత్రంలో అత్యంత ప్రాధాన్య‌తనిచ్చార‌ట‌. ముఖ్యంగా క్లైమాక్స్ స‌న్నివేశంలో విజువ‌ల్ ఫీస్ట్ అన‌ద‌గ్గ హార‌ర్ ట్రీట్ ఉంటుంద‌ని చెబుతున్నారు. నిన్న‌టి సాయంత్రం ద‌స‌ప‌ల్లాలో జ‌రిగిన కాంచ‌న3 టీమ్ మీడియా మీట్ లో ప‌లువురు సినిమా వీక్షించిన పెద్ద‌ల ముచ్చ‌ట్ల‌తో తెలిసిన సంగ‌తులివి.

లారెన్స్ మాస్టార్ ద‌ర్శ‌క‌త్వ ప్ర‌తిభ‌పై సందేహాలున్నాయా? అంటూ మ‌రో వేడెక్కించే డిస్క‌ష‌న్ సాగింది. అందుకే కేవ‌లం మాస్ కి మాత్ర‌మే క‌నెక్ట‌యితే స‌రిపోద‌ని భావించిన లారెన్స్ ఈ చిత్రంలో కంట త‌డి పెట్టించే కొన్ని స‌న్నివేశాల్ని అద్భుతంగా తీసాడ‌ని హార‌ర్ తో ఓ వైపు భ‌య‌పెడుతూనే సెంటిమెంటును రంగ‌రించ‌డం ద్వారా గ్రిప్ పెంచాడ‌ని చెబుతున్నారు. కాంచ‌న సిరీస్ లో తొలి రెండు సినిమాల‌తో పోలిస్తే హార‌ర్.. సెంటిమెంట్ మూడింత‌లు ఎక్కువేన‌ని ఆ ముచ్చ‌ట్ల‌లో వినిపించింది. కాంచ‌న 2లో నిత్యామీన‌న్ ఎపిసోడ్ త‌ర‌హా కంట త‌డి పెట్టించే గుండెను మెలిపెట్టే సీన్లు ఉన్నాయ‌ట‌. ఇప్ప‌టికే నిర్మాత ఠాగూర్ మ‌ధు సైతం ఈ సినిమా ప్రివ్యూని వీక్షించి కాన్ఫిడెంట్ గానే ఉన్నార‌ని చెప్పుకున్నారు. అయితే ఈ సినిమాతో పాటు ఏప్రిల్ 19న రిలీజ‌వుతున్న నాని `జెర్సీ` నుంచి కొంత‌వ‌ర‌కూ పోటీ ఉంటుంది. అయితే ఆ సినిమా స్పోర్ట్స్ నేప‌థ్యంలో క్లాస్ ట‌చ్ తో ఎమోష‌న‌ల్ గా సాగితే.. కాంచ‌న 3 మాత్రం ప‌క్కా ఊర మాస్ హార‌ర్ ట్రీట్ తో ఆక‌ట్టుకుంటుంద‌ని ముచ్చ‌టించుకున్నారు.