మహేష్ స్పెషల్ కేర్ అందుకేనా?

టాలీవుడ్ లో కుటుంబ కథా చిత్రాల సంఖ్య తగ్గింది కానీ కుటుంబంలో హీరోల సంఖ్య మాత్రం పెరుగుతూ వస్తోంది. ఇప్పటికే ఇండస్ట్రీలో తెగ ఫేమస్ అయిన హీరోల బంధువులు తాము కూడా హీరోలుగా వెండితెరపై వెలగాలని ఆశపడుతున్నారు. వారసత్వం వారికి కలిసొచ్చే అవకాశం కావడంతో సులువుగానే రంగంలోకి దిగిపోతున్నారు.

తాజాగా సూపర్ స్టార్ మహేష్ బాబు మేనల్లుడు.. గుంటూరు ఎంపీ గల్లా జయదేవ్ కొడుకులు అశోక్.. విక్రమ్ సినిమా హీరోలుగా నటించేందుకు సిద్ధమవుతున్నారు. గల్లా జయదేవ్ బిజినెస్ టైకూన్ కావడంతో నిర్మాతల కోసం వెతుక్కోవాల్సిన పనేం లేదు. వీళ్లిద్దరూ అమెరికాలో ఫిలిం మేకింగ్ కోర్సులు కూడా పూర్తి చేసొచ్చారు. ఎటొచ్చీ కావలసిందల్లా సరైన గైడెన్సే.. మేనళ్లుల్లకు సంబంధించి ఈ బాధ్యత మహేష్ భుజాలకెత్తుకున్నాడు. వాళ్లు హీరోలుగా రాణించేందుకు ఏఏ అంశాల్లో ఇంకా మెరుగవాలి... ఎలాంటి ట్రైనింగ్ తీసుకోవాలనే దానిపై మహేష్ ప్రత్యేకంగా దృష్టి పెట్టాడని అతడి సన్నిహితులు చెబుతున్నారు.  

ఘట్టమనేని పేరు చెప్పుకుని వచ్చిన కృష్ణ అల్లుడు సుధీర్ బాబు ఇంకా క్లిక్కవ్వట్లేదు. గల్లా జయదేవ్ పిన్ని కొడుకు కృష్ణమాధవ్ కూడా హీరోగా క్లిక్కవ్వలేదు. మహేష్ అక్క మంజుల దర్శకత్వం కాస్తా ఫ్లాపైంది. ఇండస్ట్రీలో ఘట్టమనేని ఫ్యామిలీలో అప్పటికీ.. ఇప్పటికే మహేష్ ఒక్కడే కనిపిస్తున్నాడు. అదే మిగిలిన ఫ్యామిలీల్లో ఇద్దరి నుంచి మొదలై చాలామందే హీరోలు ఉన్నారు. అందుకే ఇప్పుడు జయదేవ్ కొడుకుల కోసం మహేష్‌ స్పెషల్ కేర్ తీసుకుంటున్నాడని టాలీవుడ్ లో టాక్ వినిపిస్తోంది.