‘స్పైడర్’ రిలీజ్ డేట్.. ఎవరి మాట నమ్మాలి?

మహేష్ బాబు కొత్త సినిమా ‘స్పైడర్’ రిలీజ్ డేట్ విషయంలో నెలకొన్న సందిగ్ధతకు దాదాపుగా తెరపడ్డట్లే కనిపిస్తోంది. ఏది ఏమైనా ఈ సినిమా దసరాకే విడుదలయ్యేలా కనిపిస్తోంది. కానీ రిలీజ్ డేట్ విషయంలోనే తర్జనభర్జనలు నడుస్తున్నట్లుగా తెలుస్తోంది. మొన్ననే ‘స్పైడర్’ నిర్మాతల్లో ఒకరైన ఠాగూర్ మధు ఓ మీడియా సంస్థతో మాట్లాడుతూ.. దసరాకు సినిమా పక్కా అన్నారు. సెప్టెంబరు 22న లేదా 29న సినిమా రిలీజయ్యే అవకాశముందన్నాడు. రెండు రోజులు గడిచాక ‘స్పైడర్’ మరో నిర్మాత ఎన్వీ ప్రసాద్ లైన్లోకి వచ్చారు. ఆయన ఓ ప్రముఖ పత్రికతో మాట్లాడుతూ.. సెప్టెంబరు 27న ‘స్పైడర్’ను రిలీజ్ చేయబోతున్నట్లుగా వెల్లడించారు.

మరోవైపు రిలీజ్ డేట్ విషయంలో మహేష్ బాబు.. మురుగదాస్ ల మధ్య కూడా ఏకాభిప్రాయం లేదని అంటున్నారు. మహేష్ ముందే రావాలని అంటుంటే.. మురుగదాస్ మాత్రం 27న లేదా 29న అంటున్నాడట. అందరూ కలిసి మాట్లాడుకుని ఏదో ఒక రిలీజ్ డేట్ ఫైనలైజ్ చేసి ఒక ప్రకటన చేస్తే తప్ప అభిమానుల్లో అయోమయానికి తెరపడదేమో. ఐతే ఒక్కటి మాత్రం ఫిక్స్.. దసరా సీజన్లోనే ‘స్పైడర్’ రావడం పక్కా. ‘స్పైడర్’ రిలీజ్ డేట్ సంగతి తేలితే.. దాన్ని బట్టి ఎన్టీఆర్ మూవీ ‘జై లవకుశ’ సంగతేంటో తేలుతుంది. ‘స్పైడర్’ మీద సందేహాలుండటంతో సెప్టెంబరు 21న ఈ చిత్రాన్ని రిలీజ్ చేయబోతున్నట్లు ప్రకటించారు. కానీ ‘స్పైడర్’ దసరా రేసులోనే ఉందని తేలడంతో కొంచెం ముందుగా ఈ చిత్రాన్ని రిలీజ్ చేయడం గురించి ఆలోచిస్తున్నారట.

Like Us on Facebook : https://www.facebook.com/Tupakidotcom/