మహేష్ మరీ ఇంత ఖాళీనా?

సూపర్ స్టార్ మహేష్ బాబు ఒకప్పుడు ఎంత రిజర్వ్డ్‌గా ఉండేవాడో తెలిసిందే. ఎప్పుడైనా మీడియా ముందుకు రావడం గగనంగా ఉండేది. తన సినిమాల వేడుకల్లో కూడా పాల్గొనడమూ కష్టమే. సామాజిక మాధ్యమాల్లోనూ యాక్టివ్‌ గా ఉండేవాడు కాదు. కానీ గత కొన్నేళ్లలో మహేష్ చాలా మారిపోయాడు. బాలీవుడ్ స్టార్ల తరహాలో తన సినిమాల్ని ఉద్ధృతంగా ప్రమోట్ చేస్తున్నాడు. సోషల్ మీడియాలో చాలా యాక్టివ్ అయ్యాడు. తన సినిమాల గురించే కాదు.. వేరే వాళ్ల చిత్రాల గురించి కూడా స్పందిస్తున్నాడు. అందులోనూ ఈ మధ్య రిలీజైన ప్రతి సినిమాకూ మహేష్ రివ్యూ ఇచ్చేస్తున్నాడు. నెలకో సినిమా గురించి స్పందిస్తే ఓకే కానీ.. ఈ మధ్య కొత్త సినిమా వచ్చిందంటే సాయంత్రానికి మహేష్ రివ్యూ ఇచ్చేస్తున్నాడు.

ఈ మధ్య తమిళ సినిమాల మీదే ఎక్కువ ఫోకస్ పెడుతున్నాడని మహేష్ మీద విమర్శలొచ్చాయి. దాన్ని కవర్ చేస్తూ తెలుగు సినిమాల గురించి కూడా స్పందిస్తున్నాడు. సంక్రాంతి కానుకగా వచ్చిన తొలి సినిమా ‘యన్.టి.ఆర్-కథానాయకుడు’ను తొలి రోజే చూసేసి సాయంత్రానికల్లా ట్వీట్ చేశాడు మహేష్. 24 గంటలు గడవకముందే ఇంకో సినిమా గురించి మహేష్ ట్వీట్ పడిపోయింది. ఆ సినిమానే.. ‘పేట’. తనతో పాటు రజనీ అభిమానులందరికీ ఈ సినిమా ట్రిబ్యూట్ అని మహేష్ పేర్కొనడం విశేషం. టీం మొత్తాన్ని అభినందించిన మహేష్.. చివర్లో ‘రజనిఫైడ్’ అనే హ్యాష్ ట్యాగ్ జోడించాడు కూడా. ఐతే మహేష్ ఇలా ప్రతి సినిమా రిలీజైన వెంటనే చూసేస్తూ ట్వీట్లు చేస్తుంటే.. అతను మరీ అంత ఖాళీగా ఉన్నాడా.. షూటింగులేమీ లేవా.. మిగతా రెండు సంక్రాంతి సినిమాల రివ్యూలు కూడా ఇస్తాడా.. అంటూ నెటిజన్లు సెటైర్లు వేస్తుండటం గమనార్హం.