దీనికి కూడా ఇంత ఆలోచనా మహేష్‌?

మహేష్‌ బాబు హీరోగానే కాకుండా ఈమద్య పలు రంగాల్లో వేలు పెడుతున్న విషయం తెల్సిందే. పలు వ్యాపారాలతో పాటు థియేటర్‌ బిజినెస్‌ లో అడుగు పెట్టిన మహేష్‌ బాబు అంతకు ముందే నిర్మాతగా మారిన విషయం తెల్సిందే. ఎంబి ప్రొడక్షన్స్‌ ను ప్రారంభించిన మహేష్‌ బాబు రెండు సినిమాలకు సహ నిర్మాతగా కూడా వ్యవహరించాడు. ఇక ఆ ప్రొడక్షన్‌ లోనే నమ్రత ఒక వెబ్‌ సిరీస్‌ ను నిర్మించబోతున్నట్లుగా మూడు నాలుగు నెలలుగా వార్తలు వస్తున్నాయి. అయితే ఇప్పటికి కూడా ఆ ప్రాజెక్ట్‌ ప్రారంభం కాలేదు.

హుస్సేన్‌ షా కిరణ్‌ 'చార్లీ' అనే స్టోరీని మహేష్‌ మరియు నమ్రతలకు చెప్పాడట. చేద్దాం అంటూ హామీ ఇచ్చిన మహేష్‌ ప్రొడక్షన్‌ వర్క్‌ మొదలుకు మాత్రం ఇంకా గ్రీన్‌ సిగ్నల్‌ ఇవ్వడం లేదు. చాలా రోజులుగా దర్శకుడు హుస్సేన్‌, మహేష్‌ గ్రీన్‌ సిగ్నల్‌ కోసం ఎదురు చూస్తున్నాడట. వెబ్‌ సిరీస్‌, అది కూడా ఒక మీడియం బడ్జెట్‌ వెబ్‌ సిరీస్‌ నిర్మాణం విషయంలో మహేష్‌ మరీ ఇంతగా ఆలోచించడం కాస్త ఆశ్చర్యంగా ఉంది. కథ విషయంలో మహేష్‌ ఏమైనా మనసు మార్చుకున్నాడా అనే అనుమానాలు కూడా వస్తున్నాయి.

మహేష్‌ ఎప్పుడైతే ఓకే చెప్తాడో అప్పుడు వెంటనే నటీనటుల ఎంపిక మరియు ఇతరత్ర ప్రీ ప్రొడక్షన్‌ వర్క్‌ ను మొదలు పెట్టాలని భావిస్తున్నట్లుగా హుస్సేన్‌ చెబుతున్నాడు. మహేష్‌ బాబు మాత్రం 'మహర్షి' చిత్రంతో చాలా బిజీగా ఉన్నాడు. మహేష్‌ బిజీగా ఉన్నా కూడా 'చార్లీ'ని మొదలు పెట్టాలంటే నమ్రత ఆ పనులు చూసుకునేది. కాని మహేష్‌ ఎందుకో ఆ ప్రాజెక్ట్‌ విషయంలో ఆలోచనలో పడ్డట్లుగా గుసగుసలు వినిపిస్తున్నాయి. మహర్షి చిత్రం విడుదలైన తర్వాత మరో సారి చార్లీ గురించిన చర్చలు జరిపి అప్పుడు మహేష్‌ బాబు హుస్సేన్‌ కు ఓకే చెప్తాడేమో చూడాలి.