వీరిని మంచు లక్ష్మి మిస్‌ అవుతుందట

మల్టీ ట్యాలెంటెడ్‌ మంచు లక్ష్మికి ఇండస్ట్రీలో పలువురు స్నేహితులు ఉన్నారు. అయితే హీరోయిన్స్‌ లో రకుల్‌ ప్రీత్‌ ఈమెకు అత్యంత ఆప్తురాలిగా పేరు దక్కించుకుంది. వీరు రెగ్యులర్‌ గా కలుస్తూనే ఉంటారు. ఇటీవలే రకుల్‌ హైదరాబాద్‌ కు చేరుకుంది. దాదాపు నాలుగు నెలల తర్వాత రకుల్‌ హైదరాబాద్‌ కు తిరిగి వచ్చిన నేపథ్యంలో మంచు లక్ష్మిని కలిసేందుకు ఆమె రెడీ అవుతోంది. మొదట వారం నుండి పది రోజుల పాటు క్వారెంటైన్‌ లో ఉండి ఆ తర్వాత ఈమె స్నేహితులను కలవాలని భావిస్తుందట.

ఈ సమయంలోనే మంచు లక్ష్మి సోషల్‌ మీడియాలో ఇంట్రెస్టింగ్‌ ఫొటో షేర్‌ చేసింది. అందులో హీరోయిన్‌ రకుల్‌ ప్రీత్‌ సింగ్‌ తో పాటు దర్శకులు క్రిష్‌ మరియు ప్రకాష్‌ కోవెలమూడి ఇంకా లక్ష్మి మంచు ఉన్నారు. నాకు ఎంతో ఇష్టమైన స్నేహితులను కలిసిన సమయంలో చాలా సంతోషంగా ఉంటుంది. సన్‌ షైన్‌ ఉన్నంతగా నా ఫేస్‌ వెలిగి పోతుంది. మళ్లీ ఈ కలయిక కోసం వెయిట్‌ చేస్తున్నాను అంటూ మంచు లక్ష్మి పేర్కొంది. ఈ నాలుగు నెలలు తన స్నేహితులను బాగా మిస్‌ అయ్యాను అనే ఫీలింగ్‌ లో మంచు లక్ష్మి ఉన్నట్లుగా తెలుస్తోంది.

ప్రస్తుతం మంచు లక్ష్మి నిర్మాతగా ఒక వెబ్‌ సిరీస్‌ కు సంబంధించిన చర్చలు జరుగుతున్నాయని దాని గురించే మళ్లీ వీరు కలిసే అవకాశం ఉందని టాక్‌ వినిపిస్తుంది. క్రిష్‌ మరియు ప్రకాష్‌ కోవెలమూడిలు మంచు లక్ష్మితో ఉన్న స్నేహంతో ఆమె బ్యానర్‌ లో వెబ్‌ సిరీస్‌ చేసే అవకాశం లేకపోలేదు. అందులో రకుల్‌ ప్రీత్‌ సింగ్‌ నటించే అవకాశం కూడా ఉందంటున్నారు. మొత్తానికి వీరి కాంబో వర్కౌట్‌ అవ్వాలని ఫ్యాన్స్‌ కోరుకుంటున్నారు. త్వరలో కలవబోతున్న వీరి నుండి ఇంట్రెస్టింగ్‌ అప్‌ డేట్‌ ఏమైనా వస్తుందా అనేది చూడాలి.