మణిశర్మ 2.0 అంటున్నారు

కొంచెం ఓ పది పదిహేనేళ్ళు ఫ్లాష్ బ్యాక్ లోకి వెళ్తే ఉమ్మడి తెలుగు రాష్ట్రాలను తన సంగీతంతో ఊపేసిన మెలోడీ బ్రహ్మ మణిశర్మ గురించి తెలియని సినిమా ప్రేక్షకుడు ఉండడు అంటే అతిశయోక్తి కాదు. చిరంజీవి లాంటి సీనియర్ హీరోలతో మొదలుకుని మహేష్ బాబు జూనియర్ ఎన్టీఆర్ లాంటి అప్ కమింగ్ స్టార్స్ దాకా ప్రతి ఒక్కరికి మర్చిపోలేని బ్లాక్ బస్టర్స్ ఇవ్వడం మణిశర్మకే చెల్లింది. ఇళయరాజా రెహమాన్ ల తర్వాత అంత బలమైన ముద్ర వేయడం కూడా ఈయన వల్లే సాధ్యమనే వాస్తవం అతిశయోక్తి కాదు.

అయితే గత కొంత కాలంగా తన రేంజ్ అవుట్ పుట్ ఇవ్వలేక కాస్త రేస్ లో వెనుకబడ్డ మణిశర్మ బ్యాక్ గ్రౌండ్ స్కోర్ విషయంలో ఇప్పటికీ తన స్టామినా చాటుతూనే ఉన్నారు. తారక్ టెంపర్ సినిమాకు ఆయన ఇచ్చిన స్కోర్ సక్సెస్ లో ఓ పాత్ర వహించింది. ఇప్పుడు అంతకుమించిన మ్యూజిక్ తో మణిశర్మ 2.0 అనిపించే స్థాయిలో త్వరలో రాబోతున్నట్టు ఇన్ సైడ్ టాక్

పూరి జగన్నాధ్ దర్శకత్వంలో రామ్ హీరోగా రూపొందుతున్న ఐస్మార్ట్ శంకర్ కు మణిశర్మ అదిరిపోయే సంగీతం ఇచ్చారని యూనిట్ వర్గాల నుంచి వస్తున్న సమాచారం. ఇదేదో హైప్ కోసం చెప్పే మాట కాదని అప్పట్లో మెలోడీ బ్రహ్మ ఎలాగైతే ఎవర్ గ్రీన్ ఆల్బమ్స్ ఇచ్చేవారో దానికి ఏ మాత్రం తీసిపోని స్థాయిలో ఐస్మార్ట్ శంకర్ కు ఇచ్చినట్టు చెబుతున్నారు.

ఇంకా చెప్పాలంటే పూరి-మణిశర్మల కాంబోలో వచ్చిన పోకిరి రేంజ్ ని ఎక్స్ పెక్ట్ చేయవచ్చట. ఇంతలా ఊరిస్తున్నారు అంటే మణిశర్మ ఫ్యాన్స్ కు అంతకన్నా కావాల్సింది ఏముంది. గట్టి హిట్టు కోసం కసిమీదున్న రామ్-పూరి-చార్మీలతో పాటు మణిశర్మకు కూడా ఇది ఛాలెంజ్ లాంటిదే. ఒకే దెబ్బతో నలుగురికి ఐస్మార్ట్ శంకర్ కం బ్యాక్ ఇవ్వబోతున్నట్టు వినికిడి. చూద్దాం