మోహన్‌బాబుతో అల్లరోడి సినిమా

కొన్ని కాంబినేషన్లు భలే ఆసక్తి రేపుతాయి. వీళ్లిద్దరూ కలిసి సినిమా చేస్తున్నారేమిటా.. అని ఆశ్చర్యం కలిగిస్తాయి. అలాంటి కాంబినేషన్‌నే తెరమీదికి తెస్తున్నాడు మంచు విష్ణు. తన తండ్రి మోహన్‌బాబు, కామెడీ హీరో అల్లరి నరేష్‌ల కాంబినేషన్లో ఓ సినిమా తీయబోతున్నాడు మంచు విష్ణు. ఈ సినిమాకు దర్శకుడు శ్రీనివాసరెడ్డి. మోహన్‌బాబు హీరోగా శ్రీనివాసరెడ్డి ఓ సినిమా తీయబోతున్నాడన్న వార్త పాతదే. ఐతే అందులో అల్లరి నరేష్‌ కూడా నటిస్తుండటమే కొత్త విషయం. నరేష్‌తో శ్రీనివాసరెడ్డి 'బొమ్మన బ్రదర్స్‌ చందన సిస్టర్స్‌' సినిమా తీసిన సంగతి తెలిసిందే.

కెరీర్‌ మొదట్లో వరుసగా కామెడీ సినిమాలే తీసిన శ్రీనివాసరెడ్డి.. ఆ తర్వాత నాగార్జున లాంటి స్టార్‌ హీరోతో 'ఢమరుకం' లాంటి భారీ సోషియో ఫాంటసీ సినిమా చేశాడు. కానీ అది చేదు ఫలితాన్ని మిగిల్చింది. ఆ దెబ్బతో దాదాపు మూడేళ్లు సినిమా లేకుండా ఉండిపోయాడు శ్రీనివాసరెడ్డి. చాలామంది హీరోల్ని ట్రై చేసి చివరికి మంచి క్యాంపులో ఛాన్స్‌ కొట్టేశాడు. సెకండ్‌ ఇన్నింగ్స్‌లో ఆచితూచి సినిమాలు చేస్తున్న మోహన్‌బాబు.. శ్రీనివాసరెడ్డితో సినిమాకు ఒప్పుకోవడం విశేషమే. తనదైన శైలిలో కామెడీ ఎంటర్టైనర్‌గా ఈ సినిమాను తెరకెక్కించాలని శ్రీనివాసరెడ్డి చూస్తున్నాడు. అల్లరోడు కూడా యాడ్‌ అయ్యాడు కాబట్టి ఎంటర్టైన్‌మెంట్‌కు ఏమాత్రం ఢోకా ఉండదనే అనుకోవాలి. మోహన్‌బాబు, అల్లరి నరేష్‌ జనాల్లో ఆసక్తి రేపుతుందనడంలో సందేహం లేదు.