మహేష్ మూవీకి మొహనుడి కన్ను

భారీ సినిమాల నిర్మాతలు దిల్ రాజు, అశ్వినిదత్ సంయుక్తంగా నిర్మించబోతున్న మహేష్ బాబు 25వ సినిమాకు రంగం సిద్ధమవుతోంది. వంశీ పైడిపల్లి దర్శకత్వం వహించబోతున్న ఈ సినిమా క్వాలిటీ విషయంలో రాజీ అనే ప్రశ్నే రాకుండా అన్ని రకాలుగా టీంను సెట్ చేసుకుంటున్నారు. పాతికవ సినిమా కాబట్టి అంచనాలు మామూలుగా కంటే పది రెట్లు ఎక్కువగా ఉంటాయి. వాటిని అందుకునే విధంగా, ప్రిన్స్ కెరీర్ లో మర్చిపోలేని ల్యాండ్ మార్క్ మూవీలాగా దీన్ని తీర్చిదిద్దే పనిలో ఉన్నారు. ఒక్కొక్క టెక్నీషియన్ ను సెట్ చేసుకుంటూ వెళ్తున్న దర్శకుడు వంశీ దీనికి కెమెరామెన్ గా కెయు మోహనన్ ని తీసుకురావడం ప్రాజెక్ట్ వేల్యూని అమాంతం పెంచేసింది. ఇప్పటి దాకా తెలుగు సినిమాలకు పనిచేయని మోహనన్ ను టాలీవుడ్ కు మహేష్ సినిమా ద్వారా పరిచయం చేయబోతున్నారు.

ఇంతకీ ఎవరీ మోహనన్ అనుకుంటున్నారా. షారుఖ్ ఖాన్ మొదలుకొని ఎందరికో ఫేవరేట్ టాప్ మోస్ట్ సినీమాటోగ్రాఫర్. 2006లో వచ్చిన డాన్ - గత ఏడాది వచ్చిన రయీస్ - జబ్ హారీ మీట్స్ సీజేల్ కు ఇతనే వర్క్ చేసారు. అమీర్ ఖాన్ తలాష్ - మాధురి దీక్షిత్ అబ్ నాచ్లే లతో పాటు పలు మలయాళీ సినిమాలకు కూడా పని చేసిన అనుభవం ఈయనకు ఉంది. మాగ్నిఫిశియంట్ రన్ లాంటి పాపులర్ టీవీ సిరీస్ కు ఈయనే కెమెరా పనితనం అందించారు. ఇప్పుడు మహేష్ మూవీ మోహనన్ కు సెట్ చేయటం ద్వారా ప్రాజెక్ట్ కు ఇంకాస్త వెయిట్ వచ్చేసింది. ఈ మేరకు యూనిట్ అఫీషియల్ గా పోస్టర్ కూడా విడుదల చేసింది.

ప్రస్తుతం భరత్ అనే నేను షూటింగ్ కీలక దశలో ఉన్న మహేష్ అది అవ్వగానే ఇందులో పాల్గొంటాడు. పూజా హెగ్డే మహేష్ కు జోడిగా కడుతున్న ఈ మూవీలో అల్లరి నరేష్ ఒక కీలక పాత్రలో కనిపిస్తాడని సమాచారం. మ్యూజిక్ డైరెక్టర్ గా దేవి శ్రీ ప్రసాద్ నే వర్క్ చేయబోతున్నాడు. మే లేదా జూన్ నుంచి రెగ్యులర్ షూటింగ్ మొదలుపెట్టే అవకాశాలు ఉన్నాయి. ఫుల్ ఫ్యామిలీ ఎంటర్ టైనర్ గా వంశీ పైడిపల్లి దీన్ని తీర్చిదిద్దబోతునట్టు టాక్.