పవన్ అత్తకు మరో బంపరాఫర్

నదియా యంగ్ గా ఉన్నపుడు తమిళ డబ్బింగ్ సినిమాల ద్వారా తెలుగు ప్రేక్షకులకు పరిచయమే. ఒకటీ అరా తెలుగు సినిమాల్లోనూ కనిపించింది. కానీ ఆమెకు పెద్దగా గుర్తింపు రాలేదు. ఐతే ఆశ్చర్యకరంగా మిడిలేజ్ కు మారాక తెలుగులో మంచి పాపులారిటీ సంపాదించింది నదియా. పవన్ కళ్యాణ్ లాంటి స్టార్ హీరో సినిమాలో కీలకమైన పాత్ర చేయడంతో ఆమె రాత మారిపోయింది. ‘అత్తారింటికి దారేది’ తర్వాత ఫుల్ బిజీ అయిపోయింది. మిర్చి.. అఆ లాంటి సినిమాలు ఆమెను తెలుగులో బిజీ ఆర్టిస్టుగా మార్చేశాయి. ఇప్పుడు ఆమె మరో భారీ సినిమాలో కీలకమైన పాత్ర దక్కించుకుంది.

సూపర్ స్టార్ మహేష్ బాబు కొత్త సినిమాలో నదియా నటించబోతున్నట్లు సమాచారం. మురుగదాస్ ఆమె కోసం ఓ ప్రత్యేక పాత్రను ఆఫర్ చేశారట. పాత్ర నచ్చడం.. పైగా క్రేజీ కాంబినేషన్ కావడంతో మరో మాట లేకుండా ఈ సినిమాను ఒప్పేసుకుందట నదియా. మరి పవన్-నదియా.. ప్రభాస్-నదియా కాంబినేషన్ లాగే మహేష్-నదియా కాంబినేషన్ కూడా సూపర్ హిట్టవుతుందేమో చూడాలి. ఈ నెలాఖరులోనే సెట్స్ మీదికి వెళ్లబోతున్న ఈ సినిమాలో తమిళ దర్శకుడు.. నటుడు ఎస్.జె.సూర్య విలన్ పాత్ర పోషిస్తుండటం విశేషం. హీరోయిన్ గా రకుల్ ప్రీత్ కూడా కన్ఫమ్ అయిపోయింది. తొలి షెడ్యూల్ కోసం నిర్మాతలు ఏర్పాట్లు పూర్తి చేశారు. ఈ సినిమా కోసం మహేష్ లుక్ మార్చబోతున్నట్లు ప్రచారం జరుగుతున్న సంగతి తెలిసిందే.