మావ‌య్య‌కు హ్యాండిచ్చేసిన చైతూ

అక్కినేని నాగ‌చైత‌న్య కెరీర్ ‘ప్రేమ‌మ్’ సినిమాతో గొప్ప మ‌లుపే తిరిగింది. ఈ సినిమాతో అత‌డి ఫాలోయింగ్ బాగా పెరిగింది. ఈ సినిమాతో న‌టుడిగా ఎన్నో మెట్లు ఎక్కిన చైతూ కొత్త‌గా అభిమాన గ‌ణాన్ని బాగానే సంపాదించుకున్నాడు. ‘సాహ‌సం శ్వాస‌గా సాగిపో’ కొన్ని కార‌ణాల వ‌ల్ల ఆశించిన స్థాయిలో ఆడ‌లేదు కానీ.. ఆ సినిమా కూడా ప‌ర్వాలేద‌నిపించేదే. అందులో చైతూ పెర్ఫామెన్స్ ఆక‌ట్టుకుంది. ఈ నేప‌థ్యంలో చైతూతో సినిమాలు చేయ‌డానికి చాలామంది నిర్మాత‌లు పోటీ ప‌డుతున్నారు. ఈ పోటీలో త‌న మావ‌య్య సురేష్ బాబుకే డేట్లు ఇవ్వ‌లేని ప‌రిస్థితిలో ఉన్నాడు చైతూ.

త‌న మేన‌ల్లుడితో సినిమా చేయాల‌ని చాలా కాలంగా అనుకుంటున్నాడు సురేష్ బాబు. ఎట్ట‌కేల‌కు కృష్ణ అనే కొత్త ద‌ర్శ‌కుడు చెప్పిన క‌థ చైతూకు సూట‌య్యేలా ఉండ‌టం.. చైతూ కూడా ఆస‌క్తి చూపించ‌డంతో ఈ సినిమాను ప‌ట్టాలెక్కించేద్దామ‌నుకున్నాడు. కానీ ఆ సినిమాను ఇప్పుడు హోల్డ్ లో పెట్టిన‌ట్లు స‌మాచారం. ఇందుక్కార‌ణం చైతూకు క‌నీసం ఏడాదిన్న‌ర పాటు ఖాళీ లేక‌పోవ‌డ‌మే. ‘సోగ్గాడే చిన్నినాయ‌నా’ ఫేమ్ క‌ళ్యాణ్ కృష్ణ ద‌ర్శ‌క‌త్వంలో సినిమా మొద‌లుపెట్టేస్తున్న చైతూ.. దీని త‌ర్వాత ఇంద్ర‌గంటి మోహ‌న‌కృష్ణ డైరెక్ష‌న్లో సినిమాను ప‌ట్టాలెక్కించ‌బోతున్నాడు. దాని త‌ర్వాత ‘2 స్టేట్స్’ రీమేక్ కోసం క‌మిట్మెంట్ ఇచ్చాడు. వీట‌న్నింటి మ‌ధ్య సురేష్ బాబు సినిమాను ఇప్ప‌ట్లో చేసే ప‌రిస్థితి లేదు. అందుకే ప్ర‌స్తుతానికి ఆ సినిమాను హోల్డ్ లో పెట్టాల‌ని సురేష్‌.. చైతూ క‌లిసి నిర్ణ‌యం తీసుకున్నారు.

Like Us on Facebook : https://www.facebook.com/Tupakidotcom/