నాగార్జునకు ఉన్న కష్టాలు చాలవని..

హీరోగా అక్కినేని నాగార్జున కెరీర్ ఇప్పుడేమంత బాగా లేదు. ‘సోగ్గాడే చిన్నినాయనా’తో కెరీర్లోనే అతి పెద్ద బ్లాక్ బస్టర్ అందుకుని.. ‘ఊపిరి’ లాంటి మరో మంచి సినిమాను అందించి రెండేళ్ల కిందట మాంచి ఊపుమీద కనిపించాడు నాగ్. కానీ గత ఏడాది ఆయనకు చేదు అనుభవాలు ఎదురయ్యాయి. ‘ఓం నమో వేంకటేశాయ’ దారుణమైన దెబ్బ కొట్టగా.. స్యూర్ షాట్ హిట్ అనుకున్న ‘రాజు గారి గది-2’ కూడా తుస్సుమనిపించింది. ఇలాంటి తరుణంలో ఆయన రామ్ గోపాల్ వర్మతో ‘ఆఫీసర్’ మొదలుపెట్టాడు. వరర్మ ట్రాక్ రికార్డు ఏంటన్నది తెలిసిన సంగతే. దీనికి తోడు నాగార్జున కూడా ఫ్లాపుల్లో ఉండటంతో ఈ కాంబినేషన్ జనాల్లో ఏమాత్రం ఆసక్తి రేకెత్తించలేదు. ఈ అంచనాలకు తగ్గట్లే ‘ఆఫీసర్’ ప్రోమోలు నిస్సారంగా తయారయ్యాయి. ఒకటికి రెండు టీజర్లు రిలీజ్ చేస్తే రెండూ పెద్దగా ప్రభావం చూపించలేదు. అసలీ సినిమాకు బిజినెస్సే జరగట్లేదని అంటున్నారు.

ఇన్ని ఇబ్బందుల మధ్య ఇప్పుడు ఆర్జీవీ మీద జనాల్లో ఉన్న వ్యతిరేకత అంతా కూడా నాగార్జునకు చుట్టుకుంటోంది. ‘ఆఫీసర్’ రెండో టీజర్ రిలీజైన సందర్భంగా సోషల్ మీడియాలో వ్యక్తమైన వ్యతిరేకత చూస్తే షాకవ్వాల్సిందే. మెగా అభిమానులు.. ముఖ్యంగా పవన్ కళ్యాణ్ అభిమానులు ఈ సినిమాను మామూలుగా ట్రోల్ చేయట్లేదు. ఈ సినిమా ఎలా ఆడుతుందో చూస్తాం అన్నట్లుగా వార్నింగులు కూడా ఇస్తుండటం విశేషం. వర్మతో చాలా ఏళ్ల నుంచి మెగా అభిమానులకు కయ్యం నడుస్తోంది. కానీ అది ఇప్పుడు తీవ్ర స్థాయికి చేరింది. పవన్ కళ్యాణ్ ను శ్రీరెడ్డితో బూతు తిట్టించడం వెనుక వర్మ ఉన్నాడన్న సంగతి బయటికి వచ్చినప్పటి నుంచి వాళ్లు చాలా సీరియస్ గా ఉన్నారు. మామూలుగా నాగార్జునకు.. చిరంజీవికి ఉన్న స్నేహం దృష్ట్యా మెగా అభిమానులు నాగార్జునకు పరోక్షంగా అండగా నిలుస్తుంటారు. కానీ ఇప్పుడు నాగ్ ను కూడా వాళ్లు పట్టించుకునే పరిస్థితి లేదు. ‘ఆఫీసర్’కు నిర్మాత కూడా వర్మే కావడంతో అతడిని టార్గెట్ చేస్తూ సినిమాకు వ్యతిరేక ప్రచారం చేస్తున్నారు. సినిమా రిలీజైనపుడు ఎటాక్ గట్టిగానే ఉండబోతోందని తెలుస్తోంది.