నాని 'వాల్‌ పోస్టర్‌' లో మరోటి

హీరోలు నిర్మాతలుగా మారడం ఈ మద్య కాలంలో చాలా కామన్‌ గా చూస్తూనే ఉన్నాం. చాలా మంది హీరోల మాదిరిగానే యంగ్‌ హీరో నాని కూడా ఒక నిర్మాణ సంస్థను ఏర్పాటు చేసి ఒక సినిమాను కూడా నిర్మించిన విషయం తెల్సిందే. నాని వాల్‌ పోస్టర్‌ అనే బ్యానర్‌ ను ఏర్పాటు చేసి ప్రశాంత్‌ వర్మ దర్శకత్వంలో 'అ!' అనే చిత్రాన్ని నిర్మించాడు. విమర్శకుల ప్రశంసలు దక్కించుకున్న నాని.. ఆ సినిమాకు కొద్ది పాటి బడ్జెట్‌ పెట్టిన కారణంగా లాభాలను కూడా దక్కించుకున్నట్లుగా సమాచారం. 'అ!' చిత్రం తర్వాత నిర్మాతగా నాని రెండవ సినిమాను మొదలు పెట్టలేదు.

హీరోగా వరుసగా చిత్రాలు చేస్తున్న కారణంగా నిర్మాణంపై నాని దృష్టి పెట్టలేక పోతున్నట్లుగా తెలుస్తోంది. ఎట్టకేలకు నాని రెండవ సినిమా గురించి అధికారిక ప్రకటన చేశాడు. హీరో విశ్వక్‌ సేన్‌ తో నాని సినిమా నిర్మించబోతున్నాడు. తాజాగా విశ్వక్‌ సేన్‌ హీరోగా నటించిన 'ఫలక్‌ నుమా దాస్‌' చిత్రం ప్రమోషన్‌ వేడుకలో పాల్గొన్న నాని అదే వేదికపై తన బ్యానర్‌ లో రెండవ సినిమా గురించి అధికారిక ప్రకటన చేయడం జరిగింది.

తన నిర్మాణంలో రెండవ సినిమాను విశ్వక్‌ సేన్‌ హీరోగా చేసేందుకు ప్లాన్‌ చేస్తున్నట్లుగా ప్రకటించిన నాని ఇతర విషయాల గురించి క్లారిటీ ఇవ్వలేదు. దర్శకుడు ఎవరు.. ఎప్పుడు మొదలవ్వబోతుందనే విషయాల గురించి త్వరలోనే క్లారిటీ వస్తుందేమో చూడాలి.

ప్రస్తుతం నాని విక్రమ్‌ కె కుమార్‌ దర్శకత్వంలో 'గ్యాంగ్‌ లీడర్‌' మరియు ఇంద్రగంటి మోహన కృష్ణ దర్శకత్వంలో 'వి' అనే చిత్రాలను చేస్తున్న విషయం తెల్సిందే. మరో రెండు మూడు సినిమాలు కూడా చర్చల దశలో ఉన్నాయి. హీరోగా ఇంత బిజీగా ఉన్న సమయంలో నిర్మాణం కూడా నాని చేపట్టడం ఆశ్చర్యకర విషయం.