నానీ.. ఈసారి ఏం చేస్తావమ్మా?

మూడేళ్లుగా నాని జోరు మామూలుగా లేదు. ఒకప్పుడు వరుస ఫ్లాపులతో కెరీరే ప్రమాదంలో పడ్డ స్థితిలో ‘ఎవడే సుబ్రమణ్యం’తో అతను మళ్లీ విజయాన్నందుకున్నాడు. ఆ సినిమా పాజిటివ్ టాక్ తెచ్చుకున్నప్పటికీ గొప్ప వసూళ్లేమీ రాలేదు. 4-5 కోట్లకు మించి షేర్ సాధించలేకపోయింది. అలాంటిది గత ఏడాది చివర్లో ‘ఎంసీఏ’ సినిమా డివైడ్ టాక్‌తో మొదలై కడా రూ.35 కోట్లకు పైగా షేర్ సాధించి సంచలనం సృష్టించింది. దీన్ని బట్టే నాని ఏ స్థాయికి ఎదిగిపోయాడో అర్థం చేసుకోవచ్చు. నాని సినిమా వస్తోందంటే జనాల్లో ముందే ఒక పాజిటివ్ ఫీలింగ్ వచేస్తోంది. ఈ రోజు విడుదలవుతున్న ‘కృష్ణార్జున యుద్ధం’ కూడా పాజిటివ్ బజ్ మధ్య విడుదలవుతోంది.

అసలే నాని మాంచి ఊపుమీదుండగా.. ‘వెంకటాద్రి ఎక్స్‌ప్రెస్’, ‘ఎక్స్‌ప్రెస్ రాజా’ లాంటి సూపర్ హిట్లు కొట్టిన మేర్లపాక గాంధీ దర్శకత్వంలో అతను నటించడంతో ‘కృష్ణార్జున యుద్ధం’పై అంచనాలు పెరిగాయి. ఈ చిత్ర టీజర్.. ట్రైలర్ చాలా ఎంటర్టైనింగ్‌గా ఉండి జనాల్లో ఆసక్తి రేకెత్తించాయి. నాని కెరీర్లోనే ఈ చిత్రం అత్యధిక థియేటర్లలో రిలీజ్ చేస్తున్నారు. సమ్మర్ సీజన్లో రిలీజవుతున్న నేపథ్యంలో దీనికి ఓపెనింగ్స్ భారీ స్థాయిలో ఉంటాయని భావిస్తున్నారు. వీకెండ్ వరకు సినిమాకు ఢోకా ఉండదు. కాకపోతే వచ్చే వారం ‘భరత్ అనే నేను’ వస్తున్న నేపథ్యంలో తొలి వారంలోనే సాధ్యమైనంతగా పెట్టుబడి వెనక్కి రాబట్టుకోవాలి. ఐతే సినిమాకు ఓ మోస్తరుగా టాక్ వచ్చినా నాని లాక్కొచ్చేస్తాడనే ఫీలింగ్ జనాల్లో ఉంది. ఇలా నాని చాలా సినిమాల్నే లాక్కొచ్చాడు. మరి ‘కృష్ణార్జున యుద్ధం’ ఎలాంటి టాక్ తెచ్చుకుంటుంది.. నాని మ్యాజిక్ మళ్లీ పని చేస్తుందా.. అతడి విన్నింగ్ స్ట్రీక్ కంటిన్యూ అవుతుందా.. చూద్దాం మరి.​