'నారప్ప' కూడా రిలీజ్ డేట్ అనౌన్స్ చేశాడు..!

విక్టరీ వెంకటేష్ - దర్శకుడు శ్రీకాంత్ అడ్డాల కాంబినేషన్ లో రూపొందుతున్న యాక్షన్ థ్రిల్లర్ 'నారప్ప'. ఇది ధనుష్ నటించిన సూపర్ హిట్ తమిళ మూవీ 'అసురన్' కి రీమేక్ గా తెరకెక్కుతోంది. సురేష్ ప్రొడక్షన్స్ బ్యానర్‌ పై సురేష్ బాబు మరియు క‌లైపులి ఎస్.థాను సంయుక్తంగా ఈ చిత్రాన్ని నిర్మిస్తున్నారు. ఇందులో వెంకీ రైతుగా.. ఇద్దరు పిల్లల తండ్రిగా కనిపించనున్నాడు. ఇక నారప్ప భార్య సుందరమ్మగా హీరోయిన్ ప్రియమణి నటిస్తోంది. ఇప్ప‌టికే షూటింగ్ పూర్తి చేసుకున్న ఈ సినిమా ప్ర‌స్తుతం పోస్ట్ ప్రొడ‌క్ష‌న్ వ‌ర్క్స్ జరుపుకుంటోంది. ఈ నేపథ్యంలో తాజాగా ‘నారప్ప’ విడుదల తేదీని చిత్ర బృందం ప్రకటించింది.

మే14న (14.05.2021) ‘నారప్ప’ చిత్రాన్ని థియేటర్‌ లలో విడుదల చేయనున్నట్లు ప్రకటించారు. ఈ సందర్భంగా రెండు కొత్త పోస్టర్లను కూడా చిత్ర బృందం విడుదల చేసింది. ఇవి చూస్తుంటే తమిళ ‘అసురన్‌’ తరహాలోనే తెలుగు ‘నారప్ప’ను తీర్చిదిద్దుతున్నట్లు తెలుస్తోంది. ఈ చిత్రంలో కార్తీక్‌ రత్నం - ప్రకాశ్‌ రాజ్‌ - మురళీశర్మ ఇతర కీలక పాత్రల్లో కనిపించనున్నారు. మణిశర్మ సంగీతం సమకూరుస్తుండగా.. శ్యామ్ కె నాయుడు సినిమాటోగ్రఫీ అందిస్తున్నారు. మార్తాండ్ కె. వెంకటేష్‌ ఎడిటర్ గా.. గాంధీ నడికుడికర్‌ ఆర్ట్ డైరెక్టర్ గా చేస్తున్నారు. వెంకీ కెరీర్‌ లో 74వ సినిమాగా వస్తున్న 'నారప్ప' కచ్చితంగా హిట్ అవుతుందని ఫ్యాన్స్ ధీమాగా ఉన్నారు.