స్వీటీ శెట్టి సినిమాపై దృష్టి పెట్టిన నవీన్ పోలిశెట్టి..!

'ఏజెంట్ సాయి శ్రీనివాస ఆత్రేయ' సినిమాతో హీరోగా మారిన టాలెంటెడ్ యాక్టర్ నవీన్ పోలిశెట్టి.. ఫస్ట్ సినిమాతోనే సూపర్ హిట్ అందుకున్నాడు. ఈ క్రమంలో 'చిచోరె' సినిమాతో బాలీవుడ్ లో కూడా గుర్తింపు తెచ్చుకున్నాడు. ఇక ఇటీవల వచ్చిన 'జాతిరత్నాలు' సినిమాతో బ్లాక్ బస్టర్ హిట్ అందుకొని టాక్ ఆఫ్ ది ఇండస్ట్రీ అయ్యాడు. ఎన్నో లెక్కలు చూసుకొని ఆచి తూచి అడుగులు వేస్తున్న న‌వీన్.. ఇప్పుడు త‌న కాన్స‌న్ట్రేష‌న్ మొత్తం అనుష్క సినిమా మీద పెట్టినట్లు తెలుస్తోంది.

దక్షిణాది అగ్ర కథానాయిక అనుష్క - నవీన్ పోలిశెట్టి కాంబినేషన్ లో ఓ సినిమా తెరకెక్కనుందని ఈ మధ్య వార్తలు వస్తున్న సంగతి తెలిసిందే. 'రా రా కృష్ణయ్య' ఫేమ్ మహేష్ ఈ చిత్రానికి దర్శకత్వం వహిస్తారని తెలుస్తోంది. యూవీ క్రియేష‌న్స్ బ్యానర్ లో ఈ సినిమా తెరకెక్కనుందని సమాచారం. వాస్త‌వానికి ఏప్రిల్ 19 నుంచి ఈ సినిమాని సెట్స్ పైకి తీసుకెళ్లాలని ప్లాన్ చేయగా.. క‌రోనా నేప‌థ్యంలో స్టార్ట్ కాలేదని తెలుస్తోంది. ప‌రిస్థితులు అనుకుంటున్న‌ట్లుగా స‌ద్దుమ‌ణిగితే ఈ ప్రాజెక్ట్ జూన్ లో పట్టాలెక్కే అవ‌కాశం ఉందని అంటున్నారు.

ఇకపోతే నవీన్ పోలిశెట్టి 'జాతిర‌త్నాలు' సినిమా కంటే ముందే అనుష్క తో చేయబోయే సినిమాకు సైన్ చేశాడట. ఇదో మలయాళ సినిమా రీమేక్ అని అంటున్నారు. 20 ప్లస్ వయసున్న కుర్రాడితో 40 ప్లస్ లో ఉన్న మహిళ  ప్రేమలో పడితే ఎలా ఉంటుందనే కాన్సెప్ట్ తో ఈ రొమాంటిక్ డ్రామా రూపొందనుందని టాక్. ఇదే కనుక నిజమైతే తనకంటే వయసులో పెద్దదైన అనుష్క తో నవీన్ ఎలా నటిస్తాడనేది ఆసక్తికరంగా మారింది.