ఆహా లో కొత్త 'శుభలగ్నం'

ఫ్యామిలీ హీరోగా ఎన్నో చిత్రాల్లో నటించి మెప్పించి స్టార్‌ హీరోగా నిలిచిన జగపతి బాబు ప్రస్తుతం క్యారెక్టర్‌ ఆర్టిస్టుగా బిజీ బిజీగా ఉన్నాడు. ఒక వైపు తెలుగు.. తమిళ ఇతర భాషల సినిమాల్లో నటిస్తూనే మరో వైపు వెబ్‌ సిరీస్ ల్లో కూడా జగ్గూ భాయ్ కనిపిస్తున్నాడు. ఇటీవల ఈయన పిట్ట కథలు వెబ్‌ సిరీస్ లో కనిపించిన విషయం తెల్సిందే. త్వరలో ఈయన ఆహా కోసం మరో వెబ్‌ సిరీస్ లో కనిపించబోతున్నట్లుగా తెలుస్తోంది. ప్రముఖ దర్శకుడు ఈ వెబ్ సిరీస్ ను డైరెక్ట్‌ చేస్తున్నాడు. జగపతి బాబుకు హిట్‌ పెయిర్‌ గా అప్పట్లో నిలిచిన ఆమని ఈ వెబ్ సిరీస్ లో జోడీగా నటిస్తుందట.

ఆమని ప్రస్తుతం 'చావు కబురు చల్లగా' సినిమా తో ప్రేక్షకుల ముందుకు వచ్చేందుకు సిద్దం అయ్యింది. సెకండ్‌ ఇన్నింగ్స్ లో భాగంగా ఆమని అమ్మగా అత్తగా నటిస్తుంది. చావు కబురు చల్లగా సినిమా లో ఆమని పాత్ర చాలా విభిన్నంగా ఉంటుందని అంటున్నారు. తాజాగా ఆ సినిమా ప్రమోషన్‌ లో భాగంగా ఆమని మీడియాతో మాట్లాడుతూ జగపతిబాబుతో కలిసి ఒక యాక్షన్‌ డ్రామాలో బోల్డ్‌ పాత్రలో కనిపించబోతున్నట్లుగా చెప్పుకొచ్చింది. ఆహా లో త్వరలో ఆ ప్రాజెక్ట్‌ రాబోతున్నట్లుగా ఆమె పేర్కొంది. జగపతి బాబు మరియు ఆమని అనగానే అప్పటి ప్రేక్షకులకు ఇప్పటి ప్రేక్షకులకు శుభలగ్నం సినిమా గుర్తుకు వస్తుంది. కనుక ఆహా లో రాబోతున్న సినిమా శుభలగ్నంను మించి ఉంటుందా అనేది చూడాలి.