'అ ఆ' సినిమా సూపర్ హిట్ అవ్వడంతో నితిన్ కెరీర్లో వెనక్కి తిరిగి చూసుకోవాల్సిన అవసరం రాదని ఫాన్స్ అంతా అనుకున్నారు. కానీ తరువాత విడుదల అయిన రెండు సినిమాలు లై మరియు చల్ మోహన రంగ బాక్స్ ఆఫీస్ వద్ద బోల్తా కొట్టడంతో వారి ఆశలు ఆడియాసలు అయిపోయాయి. ఇప్పుడు మళ్లీ నితిన్ హీరోగా 'శ్రీనివాస కల్యాణం' అనే సినిమాలో నటిస్తున్నాడు.
మొట్టమొదటిసారిగా ఈ సినిమాలో రాశి ఖన్నా నితిన్ తో రొమాన్స్ చేయబోతోంది. టైటిల్ కి తగ్గట్టుగానే, ఈ సినిమా ఒక ఫ్యామిలీ ఎంటర్టైనర్ లా తెరకెక్కనుంది. దిల్ రాజు నిర్మించిన ఈ చిత్రానికి శతమానం భవతి ఫేమ్ సతీష్ వేగేశ్న దర్శకత్వం వహించారు. పల్లెటూరు బాక్ డ్రాప్ తో దాదాపు సినిమా అంతా నడుస్తుంది. కనుక షూటింగ్ అమలాపురం మరియు దగ్గరి ప్రాంతాలలో చేసినట్టు తెలుస్తోంది. ఒక్క పాట మినహా మిగతా షూటింగ్ మొత్తం పూర్తయిపోయింది. కాగా, దర్శకనిర్మాతలు సినిమా రిలీజ్ తారీఖును ఫైనల్ చేశారు.
నితిన్, రాశి ఖన్నా ముఖ్య పాత్రలు పోషించిన 'శ్రీనివాస కల్యాణం' ఆగస్ట్ 20 వ తేదీన విడుదలకు సిద్దంగా ఉంది. ఈ సినిమా ద్వారా చాలా ఏళ్ళ తరువాత దిల్ సినిమా కాంబో (నితిన్ - ప్రకాష్ రాజ్ - దిల్ రాజు) రిపీట్ అవబోతోంది. దిల్ సినిమా సూపర్ హిట్ కాబట్టి శ్రీనివాస కళ్యాణం కూడా పెద్ద హిట్ అవుతుందని అందరూ నమ్ముతున్నారు.