ఊపిరి పీల్చుకో మాహిష్మతి.. ముకేష్ యాడ్ లేదట!

ఒక సినిమాను చూడాలని ఎంతో ఆశగా టికెట్ కొనుక్కుని థియేటర్లోకి వెళ్లి కూర్చుంటాం.  టైటిల్స్ పడకముందే తో అడల్ట్స్ జడుసుకునే గాత్రంతో ముకేష్.. తగుదునమ్మ అని తయారవుతాడు. భయంకరమైన విజువల్స్ తో హారర్ సినిమా శాంపిల్ చూపిస్తారు.  నిజానికి ఈ సమయంలో క్యాన్సర్ కణితిలోపల ఏముందో చూడాలని పరితపించే మేథావులు తప్ప సాధారణ ప్రజలందరూ మనసులో బండబూతులు తిట్టుకుంటారు. కొందరేమో వాట్సాప్ లో ఏమైనా మెసేజ్ వచ్చిందో చూడాలని డిసైడ్ అవుతారు.  ఆ 'దరిద్రం' పూర్తయిన తర్వాతే తలెత్తి చూస్తారు.  

అసలు దీన్ని చూసి ఎంతమంది ధూమపాన వ్యసనం వదిలించుకున్నారో.. పొగాకు పదార్థాలను చప్పరించడం మానుకున్నారో  దేవుడెరుగు..  సినీ ప్రియులకు మాత్రం ఫ్రస్ట్రేషన్ తప్పడం లేదు. అయితే మారుతి- తేజు సినిమా 'ప్రతిరోజు పండగే' చూడబోయే సినీ ప్రియులకు అభిమానులకు ఈ 'సభ్య సందేశం' చూడాల్సిన ఖర్మ లేదు.  ఈ సినిమాలో అసలు స్మోకింగ్ సీన్స్ లేవట. అందుకే నో స్మోకింగ్ యాడ్ లేదట.  డైరెక్ట్ గా సినిమా స్టార్ట్ అవుతుంది.  ఈమధ్య కాలంలో ముకేష్ ఆవేదన.. రోదన లేని సినిమా ఇదేనట.  సో ఆ ముకేష్ టార్చర్ మీకు లేనట్టే.  అయినా మాకు ఆ ముకేష్ కావాలి.. వేలాడే దవడలు.. చిల్లులు పడిన ఊపిరిత్తుల విజువల్స్ కావాలి..  ద్రవిడ్ గారి స్వీట్ వాయిస్ లో రన్ ఔట్ కథను వన్స్ మోర్ అంటూ రెండు సార్లు వినాలి అంటే... మిమ్మల్ని ఆ రామ్ గోపాల్ వర్మ కూడా మార్చలేడు.  

ఏదేమైనా టైటిల్ లోనే పండగ ఉంది. మంచి బజ్ కూడా ఉంది. అసలు ఈ ముకేష్ లేడనే వార్త ఎంత ఆహ్లాదకరంగా ఉందో మాటల్లో వర్ణించలేం.   వాడేమైనా ముకేష్ అంబానీనా? చూస్తే డబ్బు సంపాదించాలనే ప్రేరణ కలగడానికి?  ఇంత అద్భుతమైన గిఫ్ట్ ఇచ్చిన మారుతి-సాయి ధరమ్ తేజ్ అండ్ టీం కు సాధారణ ప్రేక్షకులు అందరూ ఋణపడి ఉండాలి!