‘జై లవకుశ’ ఫస్ట్ లుక్ ఎప్పుడంటే..

సినిమా మొదలైన నెల రోజులకే టైటిల్ లోగో కమ్ కాన్సెప్ట్ మోషన్ పోస్టర్ రిలీజ్ చేసి నందమూరి అభిమానుల్ని ఆనందంలో ముంచెత్తింది ‘జై లవకుశ’ టీం. ఇక ఎన్టీఆర్ ఫ్యాన్స్ ఎదురు చూస్తోంది ఫస్ట్ లుక్ పోస్టర్.. టీజర్ కోసం దీనికి కూడా డేట్ ఫిక్సయింది. మే 20న తారక్ పుట్టిన రోజు కానుకగా ‘జై లవ కుశ’ ఫస్ట్ లుక్ రిలీజ్ చేయాలని దర్శకుడు బాబీ.. నిర్మాత కళ్యాణ్ రామ్ నిర్ణయించినట్లు సమాచారం.

ఎన్టీఆర్ పుట్టిన రోజుకు ఫస్ట్ టీజరే రిలీజ్ చేద్దామని అనుకున్నా.. రిలీజ్ ముందు అనుకున్నట్లు ఆగస్టులో కాకుండా సెప్టెంబరుకు వాయిదా పడ్డ నేపథ్యంలో మరీ ఇంత ముందుగా టీజర్ లాంచ్ చేయాల్సిన అవసరం లేదని భావించారు. టీజర్ అంటే మరీ హడావుడి అవుతుందని.. షూటింగ్ షెడ్యూళ్లకు బ్రేక్ పడుతుందని కూడా ఆలోచించి ఫస్ట్ లుక్ పోస్టర్ తో సరిపెట్టాలని డిసైడయ్యారు. మే 20న ఎన్టీఆర్ పుట్టిన రోజుకు కచ్చితంగా ఏదో ఒక కానుక ఉంటుందనే అభిమానులు ఇప్పటికే ఓ అంచనాతో ఉన్నారు.

ఐతే ‘జై లవకుశ’లో ఎన్టీఆర్ మూడు పాత్రలు పోషిస్తున్న నేపథ్యంలో ఫస్ట్ లుక్స్ మూడు రిలీజ్ చేస్తారా.. లేక ఒకదాంతో సరిపెడతారా అన్నది వేచి చూడాలి. ఒక్క లుక్కే రిలీజ్ చేస్తే మూడు పాత్రల్లో ఏది ఎంచుకుంటారన్నది కూడా ఆసక్తికరమే. ఇందులో ఎన్టీఆర్ నెగెటివ్ క్యారెక్టర్ చేస్తున్న సంగతి తెలిసిందే. దాని లుక్ కూడా వెరైటీగా ఉంటుందంటున్నారు. బహుశా దాన్ని సస్పెన్స్ లాగా అలాగే దాచి ఉంచి.. మిగతా క్యారెక్టర్లలో ఒక దాని లుక్ అభిమానులకు పరిచయం చేస్తారేమో.

Like Us on Facebook : https://www.facebook.com/Tupakidotcom/