ఎన్టీఆర్‌ కి యాక్సిడెంటా?!

టాలీవుడ్‌ లో ఓ వార్త క‌ల‌క‌లం సృష్టిస్తోంది. ముంబైలో జ‌న‌తా గ్యారేజ్ షూటింగ్‌ లో ఉన్న ఎన్టీఆర్‌ కి యాక్సిడెంట్ జ‌రిగింద‌న్న వార్తే ఆ క‌ల‌క‌లానికి కార‌ణం. షూటింగ్ జ‌రుగుతుండ‌గా అనుకోకుండా ప్ర‌మాదం చోటు చేసుకొంద‌ని, అందులో ఎన్టీఆర్ గాయ‌ప‌డ్డాడ‌ని చెప్పుకుంటున్నారు. ఆ వార్త ఎక్క‌డనుంచో పుట్టుకు రాలేదు. జ‌న‌తా గ్యారేజ్ సినిమాకి సంబంధించిన అఫీషియ‌ల్ ట్విట్ట‌ర్ పేజీలోనే ఎన్టీఆర్‌ కి యాక్సిడెంట్ అన్న విష‌యం పోస్ట్ అయ్యింది. దీంతో ఒక్క‌సారిగా ఎన్టీఆర్ అభిమానులు, తెలుగు ఇండ‌స్ట్రీ వ‌ర్గాలు ఆందోళ‌న చెందారు. నిజ‌మా అని క‌నుక్కునే ప్ర‌య‌త్నం జ‌రుగుతున్న‌ప్పుడే ఆ అకౌంట్ ఇన్‌ యాక్టివేట్ అయ్యింది. దీంతో మ‌రింత గంద‌ర‌గోళానికి గురయ్యే ప‌రిస్థితి త‌లెత్తింది. నిజంగానే ఎన్టీఆర్‌ కి యాక్సిడెంట్ జ‌రిగిందా లేదంటే అకౌంట్‌ని ఎవ‌రైనా హ్యాక్ చేశారా అన్న‌ది తేలాల్సి వుంది.

అయినా ఇప్పుడు ఎన్టీఆర్‌ కి సెట్ లో యాక్సిడెంట్ జ‌రిగే అవ‌కాశ‌మే లేద‌ని సినిమా షెడ్యూల్ గురించి తెలిసిన కొద్దిమంది చెబుతున్నారు. ఎన్టీఆర్‌ - నిత్య‌మీన‌న్‌ ల‌పై ప్ర‌స్తుతం ముంబైలో స‌న్నివేశాలు తీస్తున్నార‌ని, ఫైట్ అన్నా తీస్తుంటే ఎన్టీఆర్ గాయ‌ప‌డ్డాడన్న వార్త‌కి బ‌లం చేకూరేద‌ని, స‌న్నివేశాలే కాబట్టి యాక్సిడెంట్‌ కి అవ‌కాశ‌మే లేద‌న్న అభిప్రాయాలు వ్య‌క్త‌మ‌వుతున్నాయి. కొర‌టాల శివ ద‌ర్శ‌క‌త్వంలో తెర‌కెక్కుతున్న జ‌న‌తా గ్యారేజ్ కోసం ఈమ‌ధ్యే  ముంబై వెళ్లాడు ఎన్టీఆర్‌. మ‌రో రెండు మూడు రోజుల్లో తిరిగిరానున్నాడు. ఆ త‌ర్వాత హైద‌రాబాద్‌ లోని ఓ స్టూడియోలోనే నాన్‌ స్టాప్‌ గా షూటింగ్ జ‌రుగుతుంది.