ఎన్టీఆర్.. హనుకి ఓకే చెప్పాడా?

టాలీవుడ్లో ఈ మధ్య సెన్సేషనల్ కాంబినేషన్లు సెట్టయిపోతున్నాయి. ఒకప్పుడు ఒక స్థాయి దర్శకులతో మాత్రమే పని చేసిన స్టార్ హీరోలు.. ఇప్పుడు రూటు మారుస్తున్నారు. ఇమేజ్ ఛట్రం నుంచి బయటికి వచ్చి భిన్నమైన దర్శకులతో పని చేయడానికి ఆసక్తి చూపిస్తున్నారు. ఆ కోవలోనే ఎన్టీఆర్ లాంటి మాస్ హీరో.. సుకుమార్ లాంటి క్లాస్ డైరెక్టర్ తో సినిమా చేసి అందరినీ ఆశ్చర్యపరిచాడు. ఆ సినిమా కూడా మంచి ఫలితాన్ని అందుకోవడంతో ఎన్టీఆర్ మరో డిఫరెంట్ డైరెక్టర్ తో పని చేయడానికి ఆసక్తి చూపిస్తున్నట్లు సమాచారం అందుతోంది. ఆ దర్శకుడు మరెవరో కాదు.. ‘కృష్ణగాడి వీర ప్రేమ గాథ’తో మంచి విజయాన్నందుకున్న హను రాఘవపూడి.

‘అందాల రాక్షసి’ సినిమాతో విమర్శలు, ప్రశంసలు సమానంగా అందుకున్న హను.. ‘కృష్ణగాడి వీర ప్రేమ గాథ’ సినిమా విషయంలో మాత్రం చాలా వరకు ప్రశంసలే తీసుకున్నాడు. కమర్షియల్ సినిమాలు డీల్ చేయగలనని.. వైవిధ్యానికి వైవిధ్యం చూపిస్తూనే వినోదానికి వినోదం కూడా ఉండే సినిమాలు తీయగలనని ఈ సినిమాతో హను చాటుకోవడంతో అతడితో పని చేయడానికి చాలామంది హీరోలు ఆసక్తి చూపిస్తున్నట్లు తెలుస్తోంది. ఆ జాబితాలో ఎన్టీఆర్ పేరు కూడా ఉందట. ఎన్టీఆరే అడిగాడా.. లేక హనునే ఎన్టీఆర్ ను సంప్రదించాడా అన్నది క్లారిటీ లేదు కానీ.. మొత్తానికి వీళ్లిద్దరి కాంబినేషన్లో సినిమా వచ్చే అవకాశమైతే ఉందట. ప్రస్తుతానికి కథా చర్చలు జరుగుతున్నాయి. హను తర్వాతి సినిమా నాని హీరోగానే, 14 రీల్స్ సంస్థలోనే చేయాల్సి ఉంది. కానీ అదింకా ఫైనలైజ్ కాలేదు. దాని తర్వాతో ముందో ఎన్టీఆర్ తో సినిమా చేసే అవకాశాలున్నాయి.