శర్వా-సాయిపల్లవి.. పోస్టర్‌ తో కొట్టారు

నటుడిగా శర్వానంద్ కు ఉన్న గుర్తింపు ఎలాంటిదో కొత్తగా చెప్పాల్సిన పని లేదు. హీరోయిన్ సాయిపల్లవి సైతం చాలా తక్కువ సమయంలోనే గొప్ప నటిగా పేరు సంపాదించింది. ఇలాంటి టాలెంటెడ్ ఆర్టిస్టులు కలిసి ఓ సినిమా చేస్తున్నారంటే ఉండే ఆసక్తే వేరు. వీళ్లను హీరో హీరోయిన్లుగా పెట్టి హను రాఘవపూడి తీస్తున్న సినిమా ‘పడి పడి లేచె మనసు’. కొన్ని రోజుల కిందట శర్వానంద్ పుట్టిన రోజు సందర్భంగా రిలీజైన ఈ చిత్ర ఫస్ట్ లుక్ పోస్టర్ ప్రేక్షకుల్లో ఆసక్తి రేకెత్తించింది. ఇప్పుడు బుధవారం సాయిపల్లవి బర్త్ డే సందర్భంగా మరో పోస్టర్ లాంచ్ చేశారు. ఇది కూడా చాలా తాజాగా.. ఆసక్తికరంగా ఉండి సినిమాపై అంచనాల్ని పెంచేలా ఉంది.

బస్సెక్కడానికి సాయిపల్లవి పరుగులు తీస్తుంటే ఆమెను అనుసరిస్తున్నాడు శర్వానంద్. బ్యాక్ డ్రాప్ అంతా కూడా ఆకర్షణీయంగా ఉంది. ఈ చిత్రం కలకత్తా నగర నేపథ్యంలో సాగే ప్రేమకథ అని సమాచారం. ‘లై’తో ఎదురు దెబ్బ తిన్న హను.. ఈసారి పాత స్టయిల్లోకి వెళ్లిపోయి ప్యూర్ లవ్ స్టోరీ ట్రై చేస్తున్నాడు. సుధాకర్ చెరుకూరి.. ప్రసాద్ చుక్కపల్లి అనే కొత్త నిర్మాతలు ‘శ్రీ లక్ష్మీ వెంకటేశ్వర సినిమాస్’ బేనర్ మీద ఈ చిత్రాన్ని నిర్మిస్తున్నారు. ‘కృష్ణగాడి వీర ప్రేమ గాథ’ తర్వాత మరోసారి హను సినిమాకు సంగీతాన్నందిస్తున్నాడు విశాల్ చంద్రశేఖర్. టాకీ పార్ట్ పూర్తి కావచ్చిన ఈ చిత్రాన్ని జులై లేదా ఆగస్టులో ప్రేక్షకుల ముందుకు తెస్తారని సమాచారం. శర్వానంద్ ఈ చిత్రంతో పాటుగా సుధీర్ వర్మ దర్శకత్వంలో ఓ సినిమాలో నటిస్తున్నాడు. దీనికి భిన్నంగా ఆ సినిమా ఉంటుందని.. అందులో అతను ద్విపాత్రాభినయం చేస్తున్నాడని.. ఒక పాత్ర డాన్ అని అంటున్నారు.