‘ఖుషి’కి ఏం సీక్వెల్ తీస్తారు?

అభిమానులు ఏదో ఆశిస్తుంటే.. పవన్ కళ్యాణ్ ఇంకేదో చేస్తున్నాడు. తెలుగులో ఉన్న పెద్ద పెద్ద దర్శకుల్ని కాదని.. ఫామ్ లో లేని తమిళ దర్శకుడు ఎస్.జె.సూర్యతో తన తర్వాతి సినిమా చేయడానికి ఓకే చెప్పేశాడు. ఇది ఖుషి సీక్వెల్ అని.. కాదు కాదు వేరే కొత్త కథ అని రకరకాలుగా ప్రచారం జరిగింది. ఐతే నిన్నటి ప్రెస్ మీట్లో సైతం ఈ సినిమా గురించి ప్రస్తావన రాగా.. పవన్ క్లారిటీ ఇచ్చేశాడు. ఎస్.జె.సూర్యతో సినిమా చేస్తున్న మాట వాస్తవమని.. అది ‘ఖుషి’ సీక్వెల్ అని స్పష్టం చేశాడు పవన్.

ఐతే పుష్కరం కిందట వచ్చిన యూత్ ఫుల్ మూవీ ‘ఖుషి’కి ఇప్పుడు సీక్వెల్ తీయడం ఏంటో జనాలకు అర్థం కావడం లేదు. ఎస్.జె.సూర్య కెరీర్ లో బెస్ట్ ఫామ్ లో ఉన్నపుడు తీసిన సినిమా అది. దానికి ముందు కానీ.. తర్వాత కానీ.. అతను అంత బాగా మరే సినిమా తీయలేదు. ఈ మధ్య కాలంలో సూర్య పూర్తిగా తన టచ్ కోల్పోయాడు. సౌత్ లో అసలే సీక్వెల్స్ దారుణమైన ఫలితాలందుకున్నాయి. ఇలాంటి టైంలో ఏదైనా వేరే కథ చేసినా బాగుండేదేమో. ‘ఖుషి’కి సీక్వెల్ తీయాలనుకోవడం.. సూర్యకే ఆ బాధ్యతలు అప్పగించడం ఆశ్చర్యం కలిగించే విషయమే. పవన్ ఇప్పుడు యూత్ ఫుల్ సినిమాలు చేసే వయసులో లేడు. ఆయన ఇమేజ్ కూడా మారింది. మరి ‘ఖుషి’కి సీక్వెల్ ఎలా తీస్తారో చూడాలి మరి. అయినా ‘ఖుషి’ సీక్వెల్ తీయడానికి అనువైన సినిమా కూడా కాదు. పవన్ - సూర్యల ఆలోచన ఎలా ఉందో మరి.