అన్నయ్య తీసిన చోటనే పవన్ కూడా

తెలుగు సినిమాల్లో పాటలంటే.. అయితే అన్నపూర్ణ స్టూడియోస్ లో సెట్టేయడం. లేదంటే యురోప్ చెక్కేసి అక్కడి మంచు కొండల్లో చెక్కేయడం. చాలా సంవత్సరాల నుండి ఇదే జరుగుతోంది. కాకపోతే ఒకప్పుడు స్విట్జర్లాండ్ వంటి కొన్ని దేశాల్లోనే మనోళ్ళు విరివిగా షూటింగులు చేసేవారు. కాని ఇప్పుడు మన సినిమావాళ్ళ పాటల అవసరాలను గుర్తించిన యురోపియన్ కంట్రీస్.. మా దేశం రండి బాబోయ్ మా దేశం రండి అంటూ ఎగడబడుతున్నాయి.

ఈ మధ్య కాలంలో పోర్చుగల్.. ఇటలీ.. బల్గేరియా.. క్రొయేషియా.. చెకోస్లోవేకియా వంటి దేశాల ప్రతినిధులు మన వాళ్ళ వెంట తెగ పడుతున్నారు అనుకోండి. ఇకపోతే ఈ మధ్య కాలంలో తన సినిమాల పాటలను వివిధ దేశాల్లో చిత్రీకరణ చేయిస్తున్న పవన్.. ఇప్పుడు తన అన్నయ్య మెగాస్టార్ చిరంజీవి ఖైదీ నెం 150 పాటలను షూట్ చేసిన లొకేషన్లో తాను కూడా పాటలు చేయనున్నాడు. అత్తారింటికి దారేదిలో స్పెయిన్.. గబ్బర్ సింగ్ కోసం స్విట్జర్లాండ్.. సర్దార్ కోసం ఇటలీ వెళ్ళిన పవన్.. ఇప్పుడు త్రివిక్రమ్ సినిమా పాటల కోసం బల్గేరియా వెళుతున్నాడు. ఈ లొకేషన్లో గతంలో చాలా సినిమాల పాటలు తీసినప్పటికీ.. ఖైదీ నెం 150తో వాటికి బాగా పేరొచ్చింది. అందుకే పవన్ కూడా అక్కడికే పయనమవుతున్నాడు.

ప్రస్తుతం హైదరాబాదులో షూటింగ్ జరుపుకుంటున్న పవన్-త్రివిక్రమ్ మూవీ.. త్వరలోనే బల్గేరియా పయనమవుతోంది. ఈలోపు సంగీత దర్శకుడు అనిరుథ్ కూడా ఫైనల్ వర్షన్ సాంగ్స్ ను ఇచ్చేస్తాడట. అది సంగతి.


Like Us on Facebook : https://www.facebook.com/Tupakidotcom/