నా పేరు సూర్య నా ఇల్లు ఇండియా మూవీ మంచి వసూళ్లు సాధిస్తూ విజయం దూసుకుపోతున్న సందర్భంగా.. థ్యాంక్యూ ఇండియా మీట్ పేరుతో సక్సెస్ మీట్ నిర్వహించారు. దీనికి పవర్ స్టార్ పవన్ కళ్యాణ్ చీఫ్ గెస్ట్ గా అటెండ్ కావడం ప్రత్యేకత అని చెప్పాల్సిన పని లేదు. తను ప్రస్తుతం రాజకీయాల్లో బిజీగా ఉన్నా.. నా పేరు సూర్య కోసం స్పెషల్ గా టైం కేటాయించుకుని మరీ పవన్ రావడం విశేషం.
కార్యక్రమానికి వచ్చిన అభిమానులతో 'నా అన్నదమ్ములు అందరికీ పేరు పేరునా ప్రత్యేక కృతజ్ఞతలు' అంటూ స్పీచ్ ప్రారంభించిన పవన్.. నిర్మాత లగడపాటి శ్రీధర్ ను అడిగి ప్రత్యేకంగా నా పేరు సూర్య చిత్రాన్ని చూడాలని కోరుకుంటున్నట్లు చెప్పాడు. సినిమా బాగుందని అందరూ చెబుతున్నారని.. అందుకే సినిమా చూసిన తర్వాతే తను పర్యటనకు వెళ్తానని అన్నాడు పవర్ స్టార్. 'వక్కంతం వంశీ గారు నాకు దర్శకుడిగా కంటే రచయితగా తెలుసు. కొమరం పులి సినిమా చేస్తున్న సమయంలో ఓ కథ చెప్పారు. కానీ ఆ స్టోరీని ముందుకు తీసుకెళ్లలేకపోయాం' అన్నాడు పవన్.
ఇక్కడికి వచ్చేవరకూ తనకు అన్నయ్య నాగబాబు కూడా ఈ సినిమాకు నిర్మాత అని తెలియదని చెప్పిన పవన్.. ఆర్య నుంచి అల్లు అర్జున్ చేసిన సినిమాలు అన్నీ బాగా నచ్చాయని అన్నాడు. తల్లిదండ్రులకు.. తాతగారికి మంచి పేరు తీసుకువస్తున్నాడని అన్నాడు పవర్ స్టార్. ఇకపై కూడా అల్లు అర్జున్ మంచి సినిమాలు చేయాలని కోరుకుంటున్నానని.. మంచి సినిమా ఆదరిస్తున్న అందరికీ కృతజ్ఞతలు తెలిపాడు పవన్.