డిజె భామ ఫైర్ అయ్యింది చూశారా

డిజె సినిమాతో గ్లామర్ బ్యూటీగా అవతరించిన పూజా హెగ్డే ఉన్నట్టుండి ఫెమినిస్ట్ అవతారమెత్తింది. అమ్మాయిలు ఎందులో తక్కువ.. ఏ విషయంలో తీసిపోయారంటూ ప్రశ్నిస్తోంది. హీరోలతో సమానంగా హీరోయిన్లు రాణించగలరని వాళ్లకు ఇచ్చే అమౌంట్ ఎందుకు తక్కువ ఉండాలంటూ సోషల్ మీడియాను వేదికగా చేసుకుని క్వశ్చన్ చేస్తోంది.

ఈ సమ్మర్ లో అలనాటి మేటి నటి సావిత్రి బయోపిక్ గా వచ్చిన మహానటి సినిమా టాలీవుడ్ లో కలెక్షన్ల కనకవర్షం కురిపిస్తోంది. ఇదే టైంలో బాలీవుడ్ లో ఆలియా భట్ హీరోయిన్ గా నటించిన రాజీ సినిమా కూడా సూపర్ హిట్టయింది. ఈ రెండూ హీరోయిన్ ఓరియంటెడ్ సినిమాలే. దీనికితోడు రీసెంట్ గా రిలీజైన వీర్ ది వెడ్డింగ్ నలుగురు అమ్మాయిల కథ. ఇది కూడా లేడీ ఓరియంటెడ్ సినిమానే. అమ్మాయిల ఫీలింగ్స్ ను బోల్డ్ గా చూపించిన ఈ మూవీ బాక్సాఫీస్ ను బాగానే ఆకట్టుకుంది. ఈ ఉదాహరణలు చూపిస్తూనే పూజా హెగ్డే ఫైర్ అయిపోయింది.

‘‘చూడండి. మహిళా ప్రాధాన్యంగా వచ్చిన సినిమాల ప్రశంసలు దక్కించుకున్నాయి. డబ్బులూ రాబట్టాయి. అబ్బాయిలు ఎంత వసూలు చేయగలరో అమ్మాయిలూ అంతే వసూలు చేయగలరు. ప్రేక్షకులను థియేటర్లకు తీసుకురాగలని తేలిపోయింది. ఇప్పుడేం చెబుతారో చెప్పండి’’ అంటూ పూజా హెగ్డే ట్వీట్ చేసింది. ఈ ట్వీట్ ను ఆలియా భట్ కు.. సోనమ్ కపూర్ కు ట్యాగ్ కూడా చేసింది. ప్రస్తుతం పూజా ఎన్టీఆర్ హీరోగా త్రివిక్రమ్ డైరెక్ట్ ఛేస్తున్న అరవింద సమేత వీర రాఘవలో హీరోయిన్ గా నటిస్తోంది.