ఆధార్ కార్డులోని ప్ర‌భాస్ ఫొటో చూశారా?

భార‌తీయ చ‌ల‌న చిత్ర రంగ రికార్డుల‌ను బ‌ద్ద‌లు కొట్టేసిన బాహుబ‌లి సిరీస్ చిత్రాల‌తో ప్ర‌భాస్ నిజంగానే జాతీయ స్థాయి న‌టుడిగా ఓ రేంజిలో గుర్తింపు సంపాదించారు. స‌ద‌రు చిత్రంలో అమ‌రేంద్ర బాహుబ‌లి, మ‌హేంద్ర బాహుబ‌లి పాత్ర‌ల్లో ఆజానుబాహుడిగా క‌నిపించిన ప్ర‌భాస్ పై నేష‌న‌ల్ మీడియానే కాకుండా... ఇంట‌ర్నేష‌న‌ల్ మీడియా కూడా ఆస‌క్తిక‌ర క‌థ‌నాల‌ను రాసేసింది. రంగం ఏదైనా... అందులో టాప‌ర్‌ గా నిలిచే వ్య‌క్తిని ఇప్పుడంతా ప్ర‌భాస్‌ తోనే పోలుస్తున్న వైనం మ‌న‌కు తెలిసిందే. చివ‌ర‌కు టీమిండియా కెప్టెన్ విరాట్ కోహ్లీని కూడా బాహుబ‌లి పాత్ర‌లోని ప్ర‌భాస్‌ తో పోలుస్తూ... క్రికెట్ అభిమానులు స్టేడియాల్లో సంద‌డి చేస్తున్నారు.

ఇదంతా బాగానే ఉన్నా... ఆఫ్ స్క్రీన్‌ లో ప్ర‌భాస్ ఎంత జిడ్డుగా ఉంటాడో చూడండంటూ సోష‌ల్ మీడియాలోకి ఎక్కేసిన ఓ ఫొటో ఇప్పుడు వైర‌ల్ గా మారింది. ఆ వార్త‌లో ప్ర‌భాస్ ఆధార్ కార్డు ద‌ర్శ‌న‌మిస్తోంది. ఆధార్ కార్డులో ఎంత అందంగా క‌నిపించే వారైనా... ప్ర‌భుత్వం వాడిన సాధార‌ణ టెక్నాల‌జీ కెమెరాల‌తో ఫొటోలు తీయడంతో అవి నాసిర‌కం చిత్రాలుగా ద‌ర్శ‌నిస్తున్న సంగ‌తి తెలిసిందే. ఈ క్ర‌మంలో త‌న ఆధార్ కార్డులో ప్ర‌భాస్ ఫొటో నాసిర‌కంగానే ఉంది. ఎంత‌గానంటే... అస‌లు ఆ కార్డులో ఉన్న ఫొటో ప్ర‌భాస్‌ దేనా అనేంత‌గా. ఈ ఫొటోపై నెటిజ‌న్లు త‌మ‌దైన శైలిలో కామెంట్లు సంధిస్తున్నారు.

ఆధార్ కార్డుల యంత్రాంగాన్ని త‌ప్పుబ‌డుతున్న‌ట్లుగానే కాకుండా ప్ర‌భాస్ అందంపైనా సెటైరిక్‌ గా స్పందించిన ఓ నెటిజ‌న్ ఆధార్ కార్డులో బాహుబ‌లి కూడా బెగ్గ‌ర్ అయ్యారే అంటూ ఆశ్య‌ర్యం వ్య‌క్తం చేశారు. అయితే సోష‌ల్ మీడియాలో వ‌చ్చిన ప్ర‌భాస్ ఆధార్ కార్డు అస‌లైన‌దా?... కాదా? అన్న విష‌యంపై త‌మ‌కు కూడా కొన్ని సందేహాలున్నాయంటూ స‌ద‌రు వార్త‌ను రాసిన వెబ్‌ సైట్లు పేర్కొంటున్నాయి. ఏదేమైనా... ప్ర‌భాస్ ఆధార్ కార్డు పేరిట వ‌చ్చేసిన ఆ కార్డు ఇప్పుడు సోష‌ల్ మీడియాలో వైర‌ల్‌ గా మారిపోయింద‌నే చెప్పాలి.

Like Us on Facebook : https://www.facebook.com/Tupakidotcom/