ప్ర‌భాస్ సినిమా థ్రిల్ల‌ర్ అటండోయ్‌!

బాహుబ‌లి ఫ్రాంచైజీ త‌ర్వాత ప్ర‌భాస్ చేయ‌బోయే కొత్త సినిమా గురించి అంద‌రూ ఆస‌క్తిగా చ‌ర్చించుకుంటున్నారు. సుజీత్ ద‌ర్శ‌కత్వం వ‌హించిన ఆ చిత్రం గురించి ఇప్ప‌టికే ప‌లు ర‌కాలుగా ప్ర‌చారం సాగింది.  పోలీస్ క‌థ అనీ - యాక్ష‌న్ ఎంట‌ర్‌ టైన‌ర్‌ గా సాగుతుంద‌నీ చెప్పుకొన్నారు. ప్ర‌భాస్ తొలిసారి పోలీస్ పాత్ర చేస్తున్నాడ‌ని తెలిసి ఫ్యాన్స్ తెగ సంబ‌ర‌ప‌డిపోతున్నారు. హీరోయిజంని పీక్స్‌ లో పండించ‌డానికి పోలీస్ పాత్ర‌లు బాగా ప‌నికొస్తాయి. మ‌రి నిజంగా ప్ర‌భాస్ కొత్త సినిమాలో పోలీస్‌ గా క‌నిపిస్తాడో లేదో తెలియ‌దు కానీ... ఆ సినిమా మాత్రం ఓ థ్రిల్ల‌ర్ క‌థ‌తో తెర‌కెక్క‌బోతోంద‌న్న విష‌యం తాజాగా బ‌య‌టికొచ్చింది.

సుజీత్ తొలి సినిమా ర‌న్ రాజా ర‌న్ కూడా  కాస్త థ్రిల్ల‌ర్ త‌ర‌హాలోనే సాగుతుంది. ఇప్పుడు అదే త‌ర‌హా  ఎలిమెంట్‌ తోనే ప్ర‌భాస్ కోసం క‌థ‌ని సిద్ధం చేసిన‌ట్టు తెలుస్తోంది. యువీ క్రియేష‌న్స్ నిర్మించ‌నున్న  ఆ చిత్రం ఈయేడాది చివ‌ర్లో మొద‌ల‌య్యే అవ‌కాశాలు క‌నిపిస్తున్నాయి. బాహుబ‌లి2 చిత్రీక‌ర‌ణ పూర్త‌వ్వ‌గానే మొద‌లుపెట్టొచ్చు కానీ.. ప్ర‌భాస్ ఆ చిత్రం కోసం పెరిగిన బ‌రువునంతా త‌గ్గించుకోవాలి కాబ‌ట్టి మ‌ధ్య‌లో రెండు మూడు నెల‌లు విరామం తీసుకొంటాడ‌ట‌. ఆ త‌ర్వాతే కొత్త సినిమా కోసం రంగంలోకి దిగుతాడు.