'ఎఫ్ 3' లో హాట్ బ్యూటీతో ఐటమ్ సాంగ్..?

విక్టరీ వెంకటేష్ - మెగా ప్రిన్స్ వరుణ్‌ తేజ్‌ హీరోలుగా బ్లాక్ బస్టర్ డైరెక్టర్‌ అనిల్‌ రావిపూడి తెరకెక్కిస్తున్న సినిమా ''ఎఫ్ 3''. వీరి కాంబోలో గతంలో వచ్చిన సూపర్ హిట్ మూవీ 'ఎఫ్ 2' ఫ్రాంచైజీలో ఈ సినిమా రూపొందుతోంది. ఇందులో మిల్కీ బ్యూటీ తమన్నా భాటియా - మెహరీన్ హీరోయిన్లుగా నటిస్తుండగా.. బొమన్ ఇరానీ - సునీల్ కీలక పాత్రలు పోషిస్తున్నారు. అయితే 'ఎఫ్ 2'లో యాంకర్ అన‌సూయతో స్పెషల్ సాంగ్ చేయించిన అనిల్.. ఈసారి కూడా మాస్ ఆడియన్స్ కోసం మసాలా దట్టించడానికి రెడీ అయ్యారట.

'ఎఫ్ 3' సినిమాలో 'కంచె' బ్యూటీ ప్రగ్యా జైస్వాల్ తో ఓ ఐటమ్ సాంగ్ ప్లాన్ చేస్తున్నారని ఫిలిం సర్కిల్స్ లో టాక్ నడుస్తోంది. ప్రస్తుతం 'అఖండ' చిత్రంలో బాలయ్య సరసన హీరోయిన్ గా నటిస్తున్న ప్రగ్యా.. స్పెషల్ సాంగ్ చేస్తుందో లేదో తెలియాలంటే ఇంకొన్ని రోజులు ఆగాల్సిందే. ఇకపోతే ఫన్‌ అండ్ ఫ్రస్టేషన్‌ కి ఫైనాన్స్ ని జత చేసి 'ఎఫ్ 3' చిత్రాన్ని రూపొందిస్తున్నారు. 'ఎఫ్ 2' లో మాదిరిగా కామెడీ వర్కవుట్ అయితే ఈ సినిమా కూడా అనీల్ ఖాతాలో మరో వంద కోట్ల సినిమా అయ్యే అవకాశం ఉంది.

ఇప్పటికే 'ఎఫ్ 3' చిత్రానికి సంబంధించిన మెజారిటీ భాగం షూటింగ్ పూర్తి అయ్యింది. మైసూర్ లో చివరి షెడ్యూల్ ప్లాన్ చేయగా.. కోవిడ్ సెకండ్ వేవ్ వచ్చి బ్రేక్ వేసింది. జూలైలో ఈ సినిమా షూటింగ్ తిరిగి ప్రారంభం కానుంది. అయితే వెంకీ మాత్రం సెప్టెంబర్ లో షూట్ లో జాయిన్ అవుతారని టాక్. ఆగస్ట్ 27న ప్రేక్షకుల ముందుకు రావాల్సిన ఈ చిత్రం.. క్రిస్మస్ లేదా సంక్రాంతి సీజన్ లో వచ్చే ఛాన్స్ ఉంది. ఈ చిత్రానికి రాక్ స్టార్ దేవిశ్రీ ప్రసాద్ సంగీతం సమకూరుస్తున్నారు. శ్రీ వెంకటేశ్వర క్రియేషన్స్‌ బ్యానర్‌ పై దిల్ రాజు - శిరీష్ నిర్మిస్తున్నారు.