డ్యాన్స్ మాస్ట‌ర్ ద‌ర్శ‌క‌త్వంలో రానా?!

రైట‌ర్లు డైరెక్ట‌ర్లుగా మారుతున్న సీజ‌న్ ఇది. ప‌రిశ్ర‌మ‌లో రైట‌ర్లుగా రెండు మూడు సినిమాల‌తో పేరు తెచ్చుకోగానే వెంట‌నే డైరెక్ట‌ర్లుగా మారి కెప్టెన్ కుర్చీలో కూర్చునేందుకు ప్ర‌య‌త్నిస్తున్నారు. చాలామంది రైట‌ర్లు డైరెక్ట‌ర్లు గా స‌క్సెస్ అవుతున్నారు కూడా. ఇదివ‌ర‌కు డ్యాన్స్ మాస్ట‌ర్లు కూడా ఇలాగే డైరెక్ట‌ర్ల‌య్యారు. వాళ్ల‌లో ప్ర‌భుదేవా, లారెన్స్ లాంటి డ్యాన్స్ మాస్ట‌ర్లు స‌క్సెస్‌ ఫుల్‌ గా కొన‌సాగుతున్నారు. ఇప్పుడు వాళ్ల‌కి మ‌రో డ్యాన్స్ మాస్ట‌ర్ తోడ‌వ్వ‌బోతున్నాడు. స్టార్ల సినిమాల‌కి ప‌నిచేస్తూ బిజీగా గ‌డుపుతున్న టాలీవుడ్ కొరియోగ్రాఫ‌ర్  ప్రేమ్ ర‌క్షిత్ త్వ‌ర‌లోనే డైరెక్ట‌ర్‌ గా మారుతున్న‌ట్టు తెలిసింది. ఇప్ప‌టికే క‌థ‌ల్ని సిద్ధం చేసుకొన్న ఆయ‌న ప‌లువురు హీరోల‌కి వినిపించాడ‌ట‌. రానాకి కూడా ఓ క‌థ చెప్పాడ‌ట‌. అది విన్న రానా చేద్దామ‌ని కూడా మాటిచ్చిన‌ట్టు తెలిసింది.

ప్ర‌స్తుతం `బాహుబ‌లి2` సినిమా కోసం స‌న్న‌ద్ధ‌మ‌వుతున్నాడు రానా. ఆ చిత్రం త‌ర్వాత ప్రేమ్ ర‌క్షిత్‌ తో సినిమా చేస్తాడ‌ని ప్ర‌చారం సాగుతోంది. ఆ సినిమా కూడా రానా ఓన్ బ్యాన‌ర్ సురేష్ ప్రొడ‌క్ష‌న్స్‌ లోనే తెర‌కెక్కనున్న‌ట్టు స‌మాచారం. రానా కోసం ఇదివ‌ర‌కు కూడా ప‌లువురు ద‌ర్శ‌కులు క‌థ‌లు సిద్ధం చేసుకొన్నారు. సెల్వ రాఘ‌వ‌న్‌, హ‌ను రాఘ‌వ‌పూడి, ప‌రశురామ్ త‌దిత‌ర ద‌ర్శ‌కులు రానాని దృష్టిలో ఉంచుకొని క‌థ‌లు సిద్దం చేశారు. కానీ బాహుబ‌లి వ‌ల్ల ఆ సినిమాలు కార్య‌రూపం దాల్చ‌లేక‌పోయాయి. మ‌రి వారితో కాకుండా ప్రేమ్‌ ర‌క్షిత్‌ తో రానా సినిమా చేస్తాడా అన్నది చూడాలి. డ్యాన్స్ మాస్ట‌ర్ల‌లో ప్రేమ్ ర‌క్షిత్‌ తోపాటు ర‌ఘు కూడా త్వ‌ర‌లోనే కెప్టెన్‌ గా మారుతాడ‌ని తెలిసింది.