బాలయ్య.. నానిల బాటలో లారెన్స్

90ల్లో నందమూరి బాలకృష్ణ సినిమాలు బంగారు బుల్లోడు.. నిప్పు రవ్వ ఒకే రోజు రిలీజవడం పెద్ద సంచలనం. ఇందులో మొదటి సినిమా సూపర్ హిట్టయితే.. రెండోది యావరేజ్ గా ఆడింది. ఇక రెండేళ్ల కిందట నాని కూడా ఇలాంటి ఫీట్ రిపీట్ చేశాడు. ఉగాది వీకెండ్లో అతడి సినిమాలు ‘ఎవడే సుబ్రమణ్యం’.. ‘జెండాపై కపిరాజు’ ఒకే రోజు ప్రేక్షకుల ముందుకొచ్చాయి. అందులో మొదటి సినిమా బాగా ఆడితే.. రెండోది ఫ్లాప్ అయింది. ఇప్పుడు తమిళంలో రాఘవ లారెన్స్ సినిమాలు రెండు ఇదే తరహాలో ఒకే రోజు రిలీజయ్యేలా ఉన్నాయి. ‘శివలింగ’.. ‘మొట్ట శివ కెట్ట శివ’ చిత్రాలు ఫిబ్రవరి 17కు రిలీజ్ డేట్ ఫిక్స్ చేసుకున్నాయి. విశేషం ఏంటంటే.. ఈ రెండూ కూడా రీమేక్ సినిమాలే.

కన్నడలో సూపర్ హిట్టయిన ‘శివలింగ’ చిత్రాన్ని అదే పేరుతో పి.వాసు తమిళంలో లారెన్స్ హీరోగా తెరకెక్కించాడు. ఈ సినిమానే ముందు ఫిబ్రవరి 17కు రిలీజ్ డేట్ ఫిక్స్ చేసుకుంది. ఐతే ఎప్పుడో ఫస్ట్ కాపీతో సహా రెడీ అయి.. అనివార్య కారణాల వల్ల వాయిదా పడుతూ వచ్చిన ‘మొట్ట శివ కెట్ట శివ’ చిత్రాన్ని కూడా ఫిబ్రవరి 17కే రిలీజ్ చేయబోతున్నట్లు తాజాగా ఆర్.బి.చౌదరి ప్రకటించాడు. ఈ చిత్రం తెలుగు బ్లాక్ బస్టర్ ‘పటాస్’కు రీమేక్ కావడం విశేషం. రిలీజ్ డేట్ విషయంలో ఈ రెండు సినిమాల నిర్మాతల మధ్య సమన్వయం లేదని.. ఇద్దరూ పంతానికి పోయి ఒకే డేట్ ఫిక్స్ చేసుకున్నారని అంటున్నారు. ఈ విషయంలో లారెన్స్ జోక్యం చేసుకుని ఒక సినిమాను వాయిదా వేయించే ప్రయత్నం చేస్తే బెటర్ అంటున్నారు. కానీ నిర్మాతలు మాత్రం డేట్ మార్చుకోవడానికి ససేమిరా అంటున్నారు. మరి ఈ పోటీలో ఏ సినిమా ఎలాంటి ఫలితాన్నందుకుంటుందో చూడాలి.

Like Us on Facebook : https://www.facebook.com/Tupakidotcom/