రాఘవేంద్రరావు మాజీ కోడలు ప్ర‌ముఖ ర‌చ‌యిత‌ క‌నిక‌ నిశ్చితార్థం

ప్ర‌ముఖ సినీరచయిత కనికా ధిల్లాన్ పరిచ‌యం అవ‌సరం లేదు. వెట‌ర‌న్ డైరెక్ట‌ర్ కె.రాఘవేంద్రరావు కుమారుడు.. దర్శకుడు ప్రకాష్ కోవెలమూడిని పెళ్లాడిన క‌నిక ఆయ‌న‌ నుంచి చట్టబద్ధంగా విడాకుల‌తో విడిపోయారు. ప్ర‌కాష్ తెర‌కెక్కించిన `సైజ్ జీరో` (అనుష్క నాయిక‌) చిత్రానికి క‌నిక స్క్రీన్ ప్లే ర‌చ‌యిత‌. అలానే ఇటీవ‌ల రిలీజై బ్లాక్ బ‌స్ట‌ర్ విజ‌యం సాధించిన `జ‌డ్జిమెంట‌ల్ హై క్యా`(కంగ‌న‌) చిత్రానికి ఆమె ర‌చ‌యిత‌గా ప‌ని చేశారు. ప‌లు క్రేజీ చిత్రాల‌కు క‌నిక ప్ర‌స్తుతం వ‌ర్క్ చేస్తున్నారు.

ఇప్పుడు కనికా తన కొత్త భాగస్వామిని కనుగొన్నారన్న‌ది బాలీవుడ్ మీడియా క‌థ‌నాల సారాంశం. రాంజానా స‌హా ప‌లు విజ‌య‌వంత‌మైన చిత్రాల‌కు ర‌చ‌యిత‌గా ప‌ని చేసిన‌ బాలీవుడ్ రైట‌ర్ హిమాన్షు శర్మతో కనికా నిశ్చితార్థం జ‌రిగింది. త్వ‌ర‌లోనే ఈ జంట వివాహానికి సిద్ధ‌మ‌వుతున్నార‌ని తెలుస్తోంది. స్వరా భాస్కర్ మాజీ ప్రియుడు హిమాన్షు అన్న ప్ర‌చారం ఇదివ‌ర‌కూ మీడియాలో సాగింది.

ఈ జంట కుటుంబ స‌భ్యుల ఆమోదంతో త‌మ బంధాన్ని ముందుకు తీసుకెళ్ల‌నున్నారు. కొన్నాళ్ల అనుబంధం అనంత‌రం నిశ్చితార్థం చేసుకున్నామని త్వరలో వివాహం చేసుకోబోతున్నామని ప్రకటించడం సంతోషంగా ఉంద‌ని.. కొత్త జీవితం కోసం ఎదురు చూస్తున్నామ‌ని ఈ జంట ఉమ్మడి ప్రకటనలో పేర్కొన్నారు.

ఒక ప్రైవేట్ ఆత్మీయ వేడుకగా సాగిన నిశ్చితార్థ వేడుక‌లో ఇరువైపులా సంబంధిత కుటుంబ సభ్యులు మాత్రమే పాల్గొన్నారు. ఈ జంట అతి త్వరలోనే వివాహం చేసుకోనున్నార‌ని మీడియాలో క‌థ‌నాలు వెల్ల‌డిస్తున్నాయి.