అర్జున్ సుర‌వ‌రం .. ఇదేం సౌండింగ్‌?

గ‌త కొంత‌కాలంగా `ముద్ర` టైటిల్ వివాదం ఇండ‌స్ట్రీ వ‌ర్గాల్ని వేడెక్కించిన సంగ‌తి తెలిసిందే. ఒకే టైటిల్ తో ఇద్ద‌రు సినిమాలు తీయ‌డం గొడ‌వ‌ల‌కు దారి తీసింది. సామాజిక మాధ్య‌మాల వేదిక‌గా నిఖిల్ వ్యాఖ్య‌లు వేడెక్కించాయి. ఏదైతేనేం.. చివ‌రికి నిఖిల్ త‌న టైటిల్ ని వ‌దులుకున్నాడు. `ముద్ర` స్థానంలో `అర్జున్ సుర‌వ‌రం` అనే కొత్త టైటిల్ ని ప్ర‌క‌టించారు. దాంతో పాటే  టైటిల్ లోగోను చిత్రయూనిట్ విడుదల చేసింది. ప్రస్తుతం నిర్మాణానంత‌ర‌ పనులు సాగుతున్నాయి. మార్చి 29న రిలీజ్‌ చేయాల‌న్న‌ది ప్లాన్.  అర్జున్ .. సుర‌వ‌రం ఈ పేర్లు ఎక్క‌డో విన్న‌ట్టే ఉంది అన్న త‌లంపు తెలుగు ప్రేక్ష‌కులకు క‌లుగుతుంద‌న‌డంలో సందేహం లేదు. అందుకే ఈ టైటిల్ ని ఎంపిక చేశార‌ని అర్థ‌మ‌వుతోంది. ఇక‌పోతే ఇంత గ్యాప్ తో రిలీజ‌వుతున్న ఈ సినిమా జ‌యాప‌జ‌యాల్ని కంటెంట్ నిర్ణ‌యిస్తుంది. ఎక్క‌డికి పోతావు చిన్న‌వాడా, కేశ‌వ చిత్రాల‌తో నిఖిల్ విజ‌యాలు అందుకున్నాడు. ఆ త‌ర్వాత వ‌చ్చిన `కిరాక్ పార్టీ` ఆశించిన విజ‌యాన్ని ఇవ్వ‌లేదు. ఇప్పుడు త‌న‌ ఆశ‌ల‌న్నీ అర్జున్ సుర‌వ‌రంపైనే!

నిఖిల్ ఈ చిత్రంలో ఓ ఫోటో జర్నలిస్ట్‌ గా నటిస్తున్నారు. టి.ఎన్. సంతోష్ ద‌ర్శ‌క‌త్వంలో ఔరా సినిమాస్ పివిటి- మూవీ డైన‌మిక్స్ సంయుక్తంగా ఈ చిత్రాన్ని నిర్మిస్తున్నాయి. బి మ‌ధు స‌మ‌ర్ప‌ణ‌లో కావ్య వేణుగోపాల్, రాజు కుమార్ నిర్మిస్తున్నారు. ఇక ఈ చిత్రంలో నిఖిల్ స‌ర‌స‌న లావ‌ణ్య త్రిపాఠి క‌థానాయిక‌గా న‌టిస్తోంది. అర్జున్ సుర‌వ‌రం టైటిల్ ఎలా ఉంది? అని ప్ర‌శ్నిస్తే.. నిఖిల్ ఫ్రెండ్ రాజ్ త‌రుణ్ వెంట‌నే స్పందించారు.
 
ఈ టైటిల్ అద‌ర‌హో అంటూ హీరో రాజ్ తరుణ్ తన ట్విట్టర్ ద్వారా నిఖిల్ & టీమ్ కు శుభాకాంక్షలు తెలిపారు. ``అర్జున్ సురవరం టైటిల్ సౌండింగ్ చాలా బాగుంది. ఈ చిత్రం పెద్ద సక్సెస్ కావాలి. టీమ్ కి నా శుభాకాంక్షలు . మూవీ ఫస్ట్ ‌లుక్ కూడా అద్భుతంగా ఉంది`` అంటూ రాజ్ తరుణ్ తన ట్విట్టర్‌లో పోస్ట్ చేశారు.  దీనికి ప్ర‌రిగా `లవ్ యు మామ` అంటూ నిఖిల్ రిప్ల‌య్‌ ఇచ్చారు.