జక్కన్న బిజినెస్ మొదలైందిగా..

ఎస్.ఎస్. రాజమౌళి సినిమా దర్శకుడిగానే అందరికీ తెలుసు. కానీ ఆయనలో ఓ మంచి బిజినెస్ మేన్ కూడా ఉన్నాడు. ఆయన బాహుబలి నిర్మాత శోభు యార్లగడ్డతో కలిసి ఓ స్టార్టప్ బిజినెస్ లో పెట్టుబడి పెట్టాడు. ఈ విషయం ఈమధ్యనే వెలుగులోకి వచ్చింది. సినిమా రంగంలో సంపాదించుకున్న డబ్బు వేరే వ్యాపారాల్లో పెట్టుబడి పెట్టడం అన్నది కొత్తేం కాదు. కాకపోతే ఈ విషయంలోనూ దర్శక ధీరుడు రాజమౌళి స్టయిలే వేరు.

ప్రస్తుతం ఎలక్ట్రానిక్స్ లో స్మార్ట్ వాచ్ లు ట్రెండింగ్ లో ఉన్నాయి. ఈ బిజినెస్ లోకే జక్కన్న అడుగుపెట్టాడు. ఈ స్మార్ట్ వాచ్ స్పెషాలిటీ ఏంటంటే దీనిని ఛార్జింగ్ పెట్టాల్సిన అవసరమే ఉండదు. ఈ స్మార్ట్ వాచ్ లో ఫిట్ నెస్ ట్రాకర్ - మ్యూజిక్ కంట్రోల్ - ఎన్ఎఫ్ సీ పేమెంట్స్ వంటి ఫెసిలిటీలన్నీ ఈ వాచ్ లో ఉన్నాయి. మిగిలిన డిజిటల్ వాచ్ లలాగా వీటిని ఛార్జింగ్ పెట్టుకోవాల్సిన అసవరం ఉండదు. వీటి బ్యాటరీ లైప్ ఏడాది ఫాటు ఉంటుంది. ప్రస్తుతం ఆన్ లైన్ లో వీటి విక్రయాలు ప్రారంభించారు. ఈ విషయం రాజమౌళి కొడుకు కార్తికేయ తన ట్విట్టర్ టైమ్ లైన్ లో షేర్ చేశాడు.

ఈ స్మార్ట్ వాచ్ ఇంకో స్పెషాలిటీ ఏంటంటే ఇవి మేడిన్ ఇన్ ఇండియా. మిగతా స్మార్ట్ వాచ్ లను చైనా నుంచి ఇంపోర్ట్ చేసుకుంటారు. రాజమౌళి పెట్టుబడి పెట్టిన ఈ స్మార్ట్ వాచ్ లు ఎలక్ట్రానిక్ సిటీ బెంగుళూరులో తయారవుతాయి. రాజమౌళి టీం త్వరలోనే వీటిని రిటైల్ స్టోర్ లోకి తీసుకురానుంది.