తెలుగులో కూడా కబాలికి అదే టైటిల్ ఫిక్స్!

కబాలి.. 2015లో ప్రారంభమైన సినిమాల్లో సౌతిండియాకి మోస్ట్ ప్రెస్టీజియస్ ప్రాజెక్ట్ ఇది. లింగ ఫ్లాప్ తర్వాత సూపర్ స్టార్ రజినీకాంత్ చేస్తున్న మూవీ కావడంతో.. ముందునుంచి అంచనాలు పెరిగిపోయాయి. రజినీకాంత్ మరోసారి మాఫియా డాన్ కేరక్టర్లో నటిస్తుండడంతో.. ఆయన నుంచి మరో బాషా లాంటి మూవీ వస్తుందని ఫ్యాన్స్ హోప్స్ పెట్టుకున్నారు.

పా రంజిత్ డైరెక్షన్ లో తెరకెక్కుతున్న ఈ చిత్రంలో హీరోయిన్ గా రాధికా ఆప్టే నటించనుండగా.. ఇప్పటికే షూటింగ్ పార్ట్ దాదాపుగా పూర్తయినట్లు సమాచారం. ఈ నెలలో స్టార్ట్ కానున్న లేటెస్ట్ షెడ్యూల్ తో ప్యాచ్ వర్క్ ని కూడా ఫినిష్ చేసేసి పోస్ట్ ప్రొడక్షన్ పనులు మొదలుపెట్టేందుకు యూనిట్ సిద్ధమవుతుంది. అయితే.. ఈ కబాలి చిత్రానికి తెలుగు వెర్షన్ కు వేరే టైటిల్ పెడతారనే ప్రచారం జరిగింది. తెలుగులో మహాదేవ పేరుతో ఈ మూవీ రిలీజ్ కానుందని అనుకున్నారు. అయితే.. ఆశ్చర్యకరంగా తెలుగులో కూడా కబాలి అనే టైటిల్ నే యూనిట్ ఫిక్స్ చేసింది. ఈమేరకు పోస్టర్స్ కూడా వేసేయడంతో.. ఈ విషయం ఇప్పుడు అఫీషియల్ అయిపోయింది.

వీలైనంత త్వరగా కంప్లీట్ చేసేసి, రెండు భాషల్లోనూ ఆడియో లాంఛింగ్ తో పాటు ప్రచార కార్యక్రమాలను చేసేందుకు కబాలి నిర్మాతలు సిద్ధమవుతున్నారు. సమ్మర్ స్పెషల్ గా ఏప్రిల్ లో ఒకేసారి తెలుగు - తమిళ భాషల్లో కబాలి రిలీజ్ కానుంది  దీని షూటింగ్ పార్ట్ పూర్తి కాగానే.. శంకర్ తో చేయనున్న రోబో 2.0 సెట్స్ కు వెళ్లిపోనున్నారు సూపర్ స్టార్ రజినీకాంత్.