రకుల్ తో నాగ్ అఖిల్ హంగామా

ఈ మధ్య మన స్టార్స్ సినిమాల్లో ఏమో కాని షోరూమ్ ఓపెనింగ్స్ లో  మాత్రం యమా బిజీగా ఉంటున్నారు. గత ఏడాది ఒకే ఒక్క సినిమా చేసి సూపర్ హిట్ కొట్టిన ఓ డెబ్యు హీరొయిన్ కేవలం ఏడు నెలల కాలంలో ముప్పై రిబ్బన్ కటింగులు చేసి ఖరీదైన ఏరియాలో ఏకంగా ఫ్లాట్ కొనింది అంటే ఆశ్చర్యపోనక్కర్లేదు. ఎందుకంటే అది నిజం. ఫుల్ సెక్యూరిటీతో అన్ని రకాల ప్రయాణ వసతులతో జస్ట్ అలా ఓ గంట పాటు సమయం ఖర్చు పెడితే చాలు ప్రచారం ప్లస్ భారీ పారితోషికం వచ్చి ఒళ్లో పడతాయి. దాదాపు అందరూ ఈ బ్రాండ్ ఎండార్స్ మెంట్ లో ఏదో రూపంలో ఉన్న వాళ్ళే.

ముఖ్యంగా వీటిలో బాగా యాక్టివ్ గా ఉండే వాళ్ళలో నాగార్జునను ప్రత్యేకంగా పేర్కొనవచ్చు. కళ్యాణ్ జ్యువేలర్స్ తో బాగా యాడ్ పాపులారిటీ తెచ్చుకున్న నాగ్ సౌత్ ఇండియా షాపింగ్ మాల్ కి బ్రాండ్ ప్రమోటర్ గా ఉన్న సంగతి తెలిసిందే. రాజమండ్రిలో ఒక కొత్త షో రూమ్ ఓపెనింగ్ సందర్భంగా నాగ్ తనతో పాటు కొడుకు అఖిల్ హీరొయిన్ రకుల్ ప్రీత్ సింగ్ లను తీసుకుని ఛలో మంటూ గోదావరి తీరంలో వాలిపోయాడు.

వాటి ఫోటోలు అఖిల్ తన ఇన్స్ టాగ్రామ్ లో షేర్ చేసుకున్నాడు. ఒక స్టార్ వస్తేనే రోడ్లు బ్లాక్ అవుతాయి. అలాంటిది ఏకంగా ఐదుగురు వస్తే పరిస్థితి ఎలా ఉంటుందో ప్రత్యేకంగా చెప్పాలా. ఆ సందడి ఎంజాయ్ చేస్తూనే ముగ్గురు సెల్ఫిలు తీసుకున్నారు. అఖిల్-రకుల్ కూడా సౌత్ షాపింగ్ మాల్ కు బ్రాండ్ సెలెబ్రిటీలుగా ఉండటం ఈ కలయికకు కారణం. కాకతాళీయంగా ఈ ముగ్గురు గత కొంత కాలంగా సక్సెస్ లేక గట్టి బ్రేక్ కోసం ఎదురుచూస్తున్న వాళ్ళు కావడం గమనార్హం.