ఎన్టీఆర్‌ ను వర్మ వెంటాడుతూనే ఉన్నాడు

బాలకృష్ణ ఎప్పుడైతే తన తండ్రి బయోపిక్‌ ‘ఎన్టీఆర్‌’ ను మొదలు పెట్టాలనుకున్నాడో అప్పుడే వర్మ రంగంలోకి దిగి తాను కూడా ఎన్టీఆర్‌ గురించిన సినిమా తీస్తాను అంటూ ప్రకటించాడు. ఆ తర్వాత కొద్ది రోజులకే ‘లక్ష్మీస్‌ ఎన్టీఆర్‌’ అంటూ ప్రకటించాడు. ఎన్టీఆర్‌ సినిమాలో క్రిష్‌ చూపించకుండా వదిలేయబోతున్న కీలక అంశాలను తాను చూపిస్తాను అంటూ వర్మ చెబుతూ వస్తున్నాడు. ఇప్పటికే చిత్రీకరణ కూడా మొదలు పెట్టిన వర్మ సినిమాను రిపబ్లిక్‌ డే సందర్బంగా విడుదల చేయబోతున్నట్లుగా ప్రకటించాడు.

‘ఎన్టీఆర్‌’ చిత్రాన్ని రెండు పార్ట్‌ లుగా విడుదల చేయబోతున్నట్లుగా ప్రకటించిన క్రిష్‌ రెండవ పార్ట్‌ మహానాయకుడును రిపబ్లిక్‌ డే సందర్బంగా విడుదల చేస్తామని ప్రకటించగానే తాను కూడా అదే తేదీన లక్ష్మీస్‌ ఎన్టీఆర్‌ ను విడుదల చేస్తామంటూ ప్రకటించాడు. వర్మ సినిమాతో ఎందుకనుకున్న క్రిష్‌ అండ్‌ టీం రెండవ పార్ట్‌ ను ఫిబ్రవరిలో విడుదల చేయాలని నిర్ణయించుకున్నారు.

రేపు ఎన్టీఆర్‌ మూవీ ఆడియో విడుదల కార్యక్రమం జరుగుతుంది. ఫ్యామిలీ అంతా సంతోషంగా ఆ కార్యక్రమంలో పాల్గొనబోతున్నారు. ఆ సమయంలో గతాన్ని గుర్తు తెచ్చేలా వర్మ వెన్ను పోటు.. అంటూ పాటను విడుదల చేయబోతున్నాడు. ఆ పాటలో ఎన్టీఆర్‌ కు జరిగిన అన్యాయంను చూపించబోతున్నట్లుగా చెప్పాడు. ‘ఎన్టీఆర్‌’ ఆడియో విడుదల కాబోతున్న రోజే వెన్ను పోటు పాటను విడుదల చేయడం అనేది ఖచ్చితంగా వర్మ కసితో చేస్తున్నాడని, ఎన్టీఆర్‌ సినిమాను వర్మ పదే పదే వెంటాడేలా ఇలా చేస్తున్నాడంటూ కొందరు కామెంట్స్‌ చేస్తున్నారు. కొన్నాళ్ల క్రితం బాలయ్యతో వర్మ సన్నిహితంగా ఉండేవాడు. కాని ఇప్పుడు ఎందుకు ఎన్టీఆర్‌ ను టార్గెట్‌ చేసి ఇంతగా దెబ్బ కొట్టేందుకు చూస్తున్నాడో మరి.