పవన్ తో పోరాటానికి రంగంలోకి దిగిన రానా..!

పవర్ స్టార్ పవన్ కళ్యాణ్ - దగ్గుబాటి రానా కలిసి ఓ మల్టీస్టారర్ మూవీలో నటించనున్న సంగతి తెలిసిందే. మలయాళ హిట్ మూవీ 'అయ్యప్పనుమ్ కోషియమ్' కి తెలుగు రీమేక్ గా తెరకెక్కుతోన్న ఈ చిత్రానికి సాగర్ కె.చంద్ర దర్శకత్వం వహిస్తున్నాడు. త్రివిక్రమ్ శ్రీనివాస్ స్క్రీన్ ప్లే - డైలాగ్స్ అందిస్తున్నాడు. పీడీవీ ప్రసాద్ సమర్పణలో సితార ఎంటర్టైన్మెంట్స్ బ్యానర్‌ లో సూర్యదేవర నాగవంశీ ఈ చిత్రాన్ని నిర్మించనున్నారు. ఇటీవలే ఈ సినిమా రెగ్యులర్ షూటింగ్ ప్రారంభమైంది. ఇప్పటికే పవన్ సెట్స్ లో అడుగుపెట్టగా యాక్షన్ సన్నివేశాలను ఫైట్ మాస్టర్ దిలీప్ సబ్బరాయన్ నేతృత్వంలో చిత్రీకరిస్తున్నారు. తాజాగా రానా కూడా షూటింగ్ లో పాల్గొన్నట్లు తెలుస్తోంది.

ఈరోజు నుంచి పవన్‌ తో కలసి రానా షూటింగ్‌ లో పాల్గొననున్నాడు. ఇద్దరి కాంబినేషన్‌ లో యాక్షన్ సన్నివేశాలను షూట్ చేస్తున్నారని సమాచారం. సుమారు పది రోజులపాటు హైదరాబాద్‌ లో ఈ షెడ్యుల్ షూటింగ్ జరపనున్నారు. ఇందులో పవన్ పవర్ ఫుల్ పోలీస్ గా.. అతనికి ధీటుగా నిలిచే పాత్రలో రానా నటించనున్నారు. ఎస్‌.ఎస్‌ థమన్‌ స్వరాలు సమకూరుస్తున్న ఈ చిత్రానికి ప్రసాద్ మూరెళ్ళ సినిమాటోగ్రాఫర్ గా వ్యవహరిస్తున్నాడు. ఏ ఎస్ ప్రకాష్ ఆర్ట్ డైరెక్టర్ గా.. నవీన్ నూలి ఎడిటర్ గా వర్క్ చేస్తున్నారు.