రొమాంటిక్ 'బంగార్రాజు' .. మరింత గ్లామరస్ గా రమ్యకృష్ణ

రొమాంటిక్ హీరో అనిపించుకోవడానికి నాగార్జున మొదటి నుంచి ప్రయత్నించాడు .. ఆ విషయంలో ఆయన సక్సెస్ అయ్యాడు. రొమాన్స్ ను పండించడంలో ఆయనకంటూ ఒక స్టైల్ ఉంది .. ఆ స్టైల్ కంటూ అభిమానులు ఉన్నారు. ఆ మధ్య వచ్చిన 'సోగ్గాడే చిన్నినాయనా' సూపర్ హిట్ గా నిలవడానికి కారణం, ఆ కథలో  .. ఆ పాత్రలో రొమాన్స్ పాళ్లు ఎక్కువగా ఉండటమే. కల్యాణ్ కృష్ణ దర్శకత్వంలో వచ్చిన ఆ సినిమా, నాగార్జున కెరియర్లోనే అత్యధిక వసూళ్లను రాబట్టింది. 2016లో సంక్రాంతి విజేతగా ఆయనను నిలబెట్టింది.

ఈ సినిమాలో పల్లెటూరి బుల్లోడుగా నాగార్జున పోషించిన 'బంగార్రాజు' పాత్ర జనంలోకి బాగా దూసుకుపోయింది. ఆ పాత్ర ఆడియన్స్ కి బాగా కనెక్ట్ కావడంతో, 'బంగార్రాజు' టైటిల్ తోనే మరో సినిమా చేయాలని నాగార్జున భావించారు. ఆ బాద్యతను కూడా ఆయన కల్యాణ్ కృష్ణకే అప్పగించాడు. అనేక అవాంతరాల కారణంగా ఆ ప్రాజెక్టు వాయిదాపడుతూ వచ్చింది. ఇక ఇప్పుడు ఆ ప్రాజెక్టుకు సంబంధించిన పనులు ఒక కొలిక్కి వచ్చాయట. ఈ నెలలోనే ఈ సినిమాను సెట్స్ పైకి తీసుకెళ్లే ఆలోచన చేస్తున్నట్టుగా తెలుస్తోంది.

'సోగ్గాడే చిన్నినాయనా'లో బంగార్రాజు భార్యగా నటించిన రమ్యకృష్ణ, ఈ సినిమాలోను నటించనుందని అంటున్నారు. 'బంగార్రాజు' పాత్ర ఎంత రొమాంటిక్ గా ఉంటుందో, అందుకు తగినట్టుగానే మరింత గ్లామరస్ గా రమ్యకృష్ణను చూపించనున్నారని అంటున్నారు. ఆ సినిమాలో బంగార్రాజు .. బంగార్రాజు అంటూ సిగ్గులు ఒలకబోసిన ఆమె, ఈ  సినిమాలో మరింత సందడి చేయనుందని చెబుతున్నారు. కథ మొత్తం ఈ ఇద్దరి చుట్టూనే తిరుగుతుందని అంటున్నారు.  అన్నపూర్ణ బ్యానర్లో నిర్మితం కానున్న ఈ సినిమాతో, రమ్యకృష్ణ మరోసారి తెలుగు తెరకి గ్లామర్ టచ్ ఇవ్వనుందన్న మాట.