అల్లు అర్జున్ కోసం ప్రాణాలిస్తా-సాయిదరమ్

పవన్ కళ్యాణ్ గురించి మాట్లాడమంటే ‘చెప్పను బ్రదర్’ అనేసి పవర్ స్టార్ అభిమానులకు షాకిచ్చాడు స్లైలిష్ స్టార్ అల్లు అర్జున్. కానీ మరో వేడుకలో సాయిధరమ్ తేజ్ మాత్రం పవన్ అభిమానులు కేకలు పెడుతుంటే.. ‘ఆపలేను బ్రదర్’ అని కామెంట్ చేయడం ద్వారా బన్నీకి కౌంటర్ ఇచ్చాడు. అప్పట్నుంచి వాళ్లిద్దరినీ శత్రువుల్లా చూస్తున్నారు జనాలు. ఆ వ్యవహారం తర్వాత తేజు ఎక్కడా కూడా బన్నీ పేరెత్తింది లేదు. ఐతే తన కొత్త సినిమా ‘ఇంటిలిజెంట్’ ప్రి రిలీజ్ ఈవెంట్లో తేజు.. బన్నీ పేరెత్తడమే కాదు, తాను ఎవరికోసమైతే ప్రాణాలైనా అర్పించడానికి సిద్ధమో ఆ వ్యక్తుల పేర్లలో బన్నీది కూడా చేర్చడం విశేషం.

తనకు వరుసగా నాలుగు ఫ్లాపులు వచ్చాయని.. ఐతే ఎన్ని ఫ్లాపులు మెగా అభిమానుల్ని చూస్తే ఆటోమేటిగ్గా సంతోషం వస్తుందని.. మెగాస్టార్ చిరంజీవి స్థాపించిన సామ్రాజ్యంలో మెగా జెండా ఎగురుతూ ఉండేలా చూడటానికి ఎంతైనా కష్టపడతానని తేజు అన్నాడు. అలాగే తనకు ముగ్గురు మావయ్యలూ గురువుల్లాంటి వాళ్లని.. వాళ్లే తనను పెంచి ఇంతవాణ్ని చేశారని.. ఆ ముగ్గురితో పాటు మెగాపవర్ స్టార్ రామ్ చరణ్.. స్టైలిష్ స్టార్ అల్లు అర్జున్ ల కోసం తాను ప్రాణాలైనా అర్పించడానికి సిద్ధమని తేజు ప్రకటించాడు. వచ్చే వారం తాను.. వరుణ్ తేజ్ బాక్సాఫీస్ దగ్గర పోటీ పడబోతున్నామని అందరూ అంటున్నారని.. తమ మధ్య పోటీ ఏమీ లేదని.. అసలు ఇద్దరం కలిసి ఒకే రోజు వచ్చి హిట్టు కొడితే ఆ కిక్కే వేరుగా ఉండేదని తేజు అనడం విశేషం. బావ ఎప్పుడూ బావమరిది బతుకు కోరతాడని.. తాను కూడా వరుణ్ కూడా పెద్ద హిట్టు కొట్టాలని కోరుకుంటున్నానని తేజు అన్నాడు.