ఆ అనుభవం నేర్పింది, ఈ నమ్మకం ఉంది

చిన్న సినిమాలకు పెద్ద మ్యూజిక్ డైరెక్టర్ లాంటి వాడనే గుర్తింపు సంపాదించుకున్నాడు సాయి కార్తీక్. తన ట్యాలెంట్ నిరూపించుకునేందుకు వచ్చిన ప్రతీ అవకాశాన్ని ఉపయోగించుకుంటూ.. సూపర్ ఫాస్ట్ గా 50 సినిమాలకు మ్యూజిక్ అందించిన క్రెడిట్ ను సంపాదించుకున్నాడు. ఈ సంగీత దర్శకుడు నుంచి 50వ సినిమాగా 'రాజా చెయ్యి వేస్తే' ఈనెల 29 ప్రేక్షకుల ముందుకు రానుంది.

కాల్ సెంటర్ మూవీతో సినీ రంగ ప్రవేశం చేసిన సాయి కార్తీక్.. రౌడీ - పైసా - అసుర - ప్రతినిధి - పటాస్ - రాజుగారి గది చిత్రాలతో పాటు.. లేటెస్ట్ హిట్ ఈడో రకం ఆడో రకం కి కూడా సంగీతం అందించాడు. తన కెరీర్ లో ఎన్నో హిట్ సినిమాలు ఉండడం సాయి కార్తీక్ కి అడ్వాంటేజ్. 'ఎనిమిదేళ్లలో 50 చిత్రాలకు సంగీతం అందించాను. ఇది వేగంగా సాగిన ప్రయాణమే. మొదట రామ్ గోపాల్ వర్మ - కృష్ణ వంశీ లాంటి దర్శకులతో పని చేయడం ఎంతో ఉపయోగపడింది' అంటున్నాడు సాయి కార్తీక్.

నారో రోహిత్ తో స్పెషల్ బాండింగ్ ఉందని.. అతని సినిమాలకు మ్యూజిక్ ఇవ్వడాన్ని ఇష్టపడతానన్న సాయి కార్తీక్.. నారా హీరోతో 50వ చిత్ర మైలు రాయిని అందుకోవడం హ్యాపీగా ఉందని చెబుతున్నాడు. రీమిక్స్ విషయంలో.. ఆ పాట ఒరిజినల్ ఆత్మను చెడగొట్టాడనే చెడ్డపేరు రాకుండా జాగ్రత్త పడతాడట. అయితే.. ఇంతవరకూ స్టార్ హీరోలతో సినిమా చేసే ఆఫర్ రాకపోవడం మాత్రం నిరుత్సాహం కలిగించేదే అయినా.. త్వరలో ఆ ఆఫర్ అందుకుంటాననే నమ్మకం ఉందని సాయి కార్తీక్ అంటున్నాడు.