ఆ సినిమా ఏమైంది బాస్?

ఎప్పుడో రెండేళ్ల కిందట మొదలైంది బర్నింగ్ స్టార్ సంపూర్ణేష్ బాబు సినిమా ‘కొబ్బరి మట్ట’. కానీ ఇంతవరకు రిలీజవ్వలేదు. అసలెప్పుడు రిలీజవుతుందో తెలియదు. అప్పుడప్పుడూ మెరుపులు మెరిపించడం.. ఆ తర్వాత సైడైపోవడం.. ఇలా సాగుతోంది బర్నింగ్ స్టార్ వరస. సినిమా లాంచ్ టైంలో చేసిన హడావుడి అంతా ఇంతా కాదు. అట్రాక్టివ్ పోస్టర్లతో.. ప్రకటనలతో బాగానే హంగామా చేశారు. ఆ తర్వాత అప్పుడప్పుడూ పోస్టర్లు వదులుతూ సినిమాను వార్తల్లో నిలిపారు. షూటింగ్ అప్ డేట్స్ కూడా ఇస్తూ వచ్చారు. ఆ మధ్య బర్నింగ్ స్టార్ లెంగ్తీ డైలాగ్ తో ఒక టీజర్ వదిలారు. అది జనాల్ని బాగానే ఆకర్షించింది. కానీ టీజర్ వదిలి చాలా నెలలవుతున్నా సినిమా విడుదల సంగతే తేలట్లేదు.

ఇప్పుడు జనాలంతా ‘కొబ్బరి మట్ట’ గురించి పూర్తిగా మరిచిపోయారు. మధ్యలో ఈ సినిమా బిజినెస్ అంత ఇంత అంటూ ఏవో వార్తలొచ్చాయి కానీ.. అదంతా ఉత్తుత్తి వ్యవహారం అన్న కామెంట్లు కూడా వినిపించాయి. ఆ సంగతలా వదిలేస్తే.. సంపూను పెట్టి తీసిన మామూలు సెటైరికల్ సినిమా ఇంతగా ఎందుకు ఆలస్యమవుతోందో అర్థం కావడం లేదు. క్రేజ్ ఉన్నపుడే సినిమాను రిలీజ్ చేస్తే ఫలితం ఉండేది. ఇప్పుడు ఆ సినిమా వార్తల్లోంచి పక్కకు వెళ్లిపోయింది. రోజు ట్విట్టర్లో.. ఫేస్ బుక్ లో ఏదో ఒక మెసేజ్ పెట్టే సంపూ.. ‘కొబ్బరిమట్ట’ గురించి మాత్రం ఎందుకు మాట్లాడట్లేదో ఏంటో? రూపక్ రొనాల్డ్ దర్శకత్వం వహించిన ఈ చిత్రంలో సంపూ మూడు రకాల పాత్రలు చేయడం విశేషం.

Like Us on Facebook : https://www.facebook.com/Tupakidotcom/