సిక్స్‌ ప్యాక్‌ లో సంపూ...!

ముద్దుపేరే.. తెగింపు అని త‌న తాను ప‌రిచ‌యం చేసుకొన్నాడంటే సంపూలో ఎంత గ‌ట్స్ ఉంటాయో అర్థం చేసుకోవ‌చ్చు. ఆ గ‌ట్స్‌ కి త‌గ్గ‌ట్టే ఆయ‌నే తెర‌పై రాణిస్తున్నాడు. క‌థానాయ‌కుడిగా తొలి చిత్రంతోనే సంచ‌ల‌నాలు సృష్టించాడు సంపూ. హృద‌య‌కాలేయంతో స్టార్ హీరోల‌కి ఏమాత్రం తీసిపోని స్థాయిలో డైలాగులు చెప్పాడు. త‌న మార్క్ స్టెప్పుల‌తోనూ అద‌ర‌గొట్టాడు. దీంతో సంపూ క్రేజ్ ఒక్క‌సారిగా పెరిగిపోయింది. ఏ వేడుక‌కి వ‌చ్చినా సంపూనే స్పెష‌ల్ అట్రాక్ష‌న్ అయిపోతుంటాడు. అలాంటి సంపూ ఇప్పుడు మ‌రో సంచల‌నానికి తెరదీయ‌బోతున్నాడు. తాను క‌థానాయ‌కుడిగా న‌టిస్తున్న రెండో చిత్రం కొబ్బ‌రిమ‌ట్ట కోసం సిక్స్‌ ప్యాక్ చేశాడు. సంక్రాంతికి సంపూ సిక్స్‌ ప్యాక్‌ తో కూడిన స్టిల్ బ‌య‌టికి రాబోతోంది. ఆ విష‌యాన్ని స్వ‌యంగా వెల్ల‌డించాడు సంపూ. ట్విట్ట‌ర్ ద్వారా సంపూ సిక్స్‌ ప్యాక్ విష‌యాన్ని తెలుసుకొన్న నెటిజ‌న్లు అవునా... అంటూ ఆశ్చ‌ర్యం వ్య‌క్తం చేయడం మొద‌లుపెట్టారు.

హృద‌య‌కాలేయం టీమ్ నుంచే రాబోతున్న కొబ్బ‌రిమ‌ట్ట‌లో సంపూ మూడు ర‌కాల పాత్ర‌ల్లో క‌నిపించ‌బోతున్నాడు. ఒక‌టి పాపారాయుడు పాత్రైతే, మ‌రొక‌టి పెద‌రాయుడు పాత్ర‌, మూడోది ఆండ్రాయిడు పాత్ర‌.  ఆండ్రాయుడు పాత్ర కోస‌మే సంపూ సిక్స్‌ ప్యాక్ చేశాడ‌ట‌. సంపూలాంటోడు సిక్స్‌ ప్యాక్ చేశాడంటే నిజంగా ఇది పెద్ద విశేష‌మే. క‌మెడియ‌న్ల‌లో సిక్స్‌ ప్యాక్ చేసిన‌వాళ్లు అరుదు. ఇదివ‌ర‌కు సునీల్ మాత్ర‌మే అలా పూల‌రంగ‌డులో సిక్స్‌ ప్యాక్‌ తో క‌నిపించాడు. ఆ త‌ర్వాత మ‌ళ్లీ సంపూనే.