మెగాస్టార్ టైపు పాత్రలో కట్టప్ప

సత్య రాజ్ అంటే తండ్రి పాత్రలు చాలా బాగా పోషిస్తాడు అని కొంతమందికి తెలుసు. కానీ కట్టప్ప అంటే గుర్తుపట్టని వారు ఉండరు. దాదాపు రెండు సంవత్సరాలు కట్టప్ప బాహుబలిని ఎందుకు చంపాడు అనుకుంటూ ఆ పేరు మన నోట్లో నానుతూనే ఉంది. అలా ఒక మంచి పాత్ర లో ప్రేక్షకులను అలరించిన సత్య రాజ్ ఇప్పుడు మరొక డిఫరెంట్ రోల్ చేయబోతున్నారు.

రామ్ గోపాల్ వర్మ హిందీ లో తీసిన సర్కార్ సినిమా సూపర్ హిట్. ఆ సినిమాకు ఇప్పటికే రెండు సీక్వెల్స్ కూడా తీసేసాడు వర్మ. అందులో మెగాస్టార్ అమితాబ్ బచ్చన్ దే ముఖ్య పాత్ర. కొంచెం విలన్ లుక్స్ తో కనపడే అమితాబ్ విలన్ కాదు కథకు హీరో. నిజానికి హాలీవుడ్ గాడ్ ఫాథర్ స్పూర్తితో ఈ స్క్రిప్ట్ రాసుకున్న ఆర్.జి.వి మరాఠీ రాజకీయ పార్టీ శివసేన వ్యవస్థాపకుడు బాల్ థాకరే ను బేస్ చేసుకుని అమితాబ్ పాత్రను రచించారు. ప్రజలకు మేలు చేయడంకోసం పోలీసులను లెక్క చేయని తరహాలో ఉంటుంది. ఈ పాత్ర జనాలకు బాగా కనెక్ట్ అయ్యింది. ఇప్పుడు మన కట్టప్ప 'నోటా' అనే చిత్రంలో ఇదే తరహా పాత్ర పోషిస్తున్నట్టు టాక్.

విజయ్ దేవరకొండ మెహరీన్ హీరో హీరోయిన్లుగా ఆనంద్ శంకర్ దర్శకత్వంలో రూపుదిద్దుకుంటున్న ఈ చిత్రం తెలుగు, తమిళ భాషల్లో విడుదల చేయబోతున్నారు. నాజర్ కూడా ఇందులో కీలక పాత్ర పోషిస్తున్నారు. స్టూడియో గ్రీన్ జ్ఞానవేల్ రాజా నిర్మిస్తున్న నోటా సినిమాలో కట్టప్ప చేయబోతున్న పాత్ర చాలా విభిన్నంగా, శక్తిమంతంగా ఉంటుంది అని దర్శకుడు చెప్పుకొచ్చారు.