మరో సౌత్ సినిమా రీమేక్ ఆలోచనలో స్టార్ హీరో!

బాలీవుడ్ స్టార్ హీరో షాహిద్ కపూర్.. తెలుగు ‘అర్జున్ రెడ్డి’కి రీమేక్‌గా ‘కబీర్ సింగ్’ సినిమాతో తీసి చాలాకాలం తర్వాత బ్లాక్ బస్టర్ హిట్ అందుకున్నాడు. ఇక ప్రస్తుతం మరో రీమేక్‌లో నటిస్తున్నాడు. గతేడాది తెలుగులో మంచి విజయం అందుకున్న ‘జెర్సీ’ సినిమాను హిందీలో రీమేక్ చేస్తున్న సంగతి తెలిసిందే. నేచురల్ స్టార్ నాని పాత్రలో షాహిద్ కపూర్ నటిస్తున్నాడు. ఈ నేపథ్యంలో క్రికెట్‌ ప్రాక్టీస్ చేయడం మొదలుపెట్టాడు షాహిద్. జెర్సీ రీమేక్ విషయానికొస్తే.. క్రికెట్ నేపథ్యంలో ఎమోషనల్ డ్రామాగా ఈ చిత్రం తెరకెక్కనుంది. యంగ్ క్రికెటర్‌గా.. భర్తగా.. తండ్రిగా.. 36 ఏళ్ల వయసులో మళ్లీ క్రికెట్ బ్యాట్ పట్టిన ఆటగాడిగా ఈ సినిమాలో షాహిద్ కనిపించనున్నాడు. తెలుగులో జెర్సీ సినిమాను తెరకెక్కించిన గౌతమ్ తిన్ననూరి హిందీ వెర్షన్‌ను కూడా తెరకెక్కిస్తున్నాడు.

అయితే జెర్సీ షూటింగ్ దశలో ఉండగానే మరో సినిమాను రీమేక్ చేయడానికి లైన్ లో పెట్టాడట షాహిద్. కాకపోతే ఈసారి తెలుగు సినిమా కాదు తమిళ సినిమా. స్టార్ హీరో సూర్య ప్రధాన పాత్రలో తెరకెక్కుతున్న 'సురారై పోట్రు' సినిమా. తెలుగులో 'ఆకాశమే నీ హద్దురా' అనే టైటిల్ తో విడుదల కానుంది. అయితే ఈ సినిమాను రీమేక్ చేయడానికి షాహిద్ ఆసక్తి చూపుతున్నట్లు సమాచారం. ఈ సినిమాను ఒక నిజ జీవిత కథ ఆధారంగా సుధ కొంగర రూపొందిస్తున్నారు. ఎయిర్ దక్కన్ ఫౌండర్ జిఆర్ గోపినాథ్ లైఫ్ ఆధారంగా ఈ సినిమా రూపొందింది. ఈ సినిమా కథ గురించి తెలుసుకున్న షాహిద్ రీమేక్ లో నటించేందుకు సిద్దంగా ఉన్నట్లు తెలిపాడట. అయితే ఈ సినిమా హిందీ హక్కులను గునిత్ మోంగా దక్కించుకున్నట్లు తెలుస్తుంది. అధికారిక ప్రకటన త్వరలో రానుందట.