చిరు.. బాలయ్య కంటే ముందు శర్వా

సంక్రాంతికి ముందుగా బెర్తులు బుక్ చేసుకున్న సినిమాలు ఖైదీ నెంబర్ 150.. గౌతమీపుత్ర శాతకర్ణి. వీటి షూటింగ్ కూడా ముందుగా మొదలైంది. వీటి తర్వాత రేసులోకి వచ్చింది ‘శతమానం భవతి’. కానీ యమ స్పీడుగా షూటింగ్ పూర్తి చేసుకుని.. చిరు, బాలయ్యల సినిమాల కంటే ముందు ఫస్ట్ కాపీతో రెడీ అయిపోయింది. ఆడియో వేడుక కూడా ముందు దీనికే జరిగింది. ఇప్పుడు సెన్సార్ పూర్తి చేసుకోవడంలోనూ ‘శతమానం భవతి’నే ముందు నిలిచింది. విడుదలకు ఇంకా 17 రోజులు ఉండగానే ఈ చిత్రానికి సెన్సార్ సర్టిఫికెట్ వచ్చేయడం విశేషం. కంప్లీట్ ఫ్యామిలీ ఎంటర్టైనర్‌ గా తెరకెక్కిన ఈ చిత్రానికి అనుకున్నట్లే సెన్సార్ వాళ్లు క్లీన్ ‘యు’ సర్టిఫికెట్ కట్టబెట్టారు.

‘‘మా శతమానం భవతి చిత్రానికి సెన్సార్ పూర్తయింది. ఇది తాతామనవళ్ల బంధం నేపథ్యంలో సాగే అందమైన ఫ్యామిలీ ఎంటర్టైనర్. మిక్కీ జే మేయర్ ఆహ్లాదకరమైన సంగీతాన్నందించాడు. ఆడియోకు మంచి స్పందన వచ్చింది. సంక్రాంతికి సినిమాను రిలీజ్ చేస్తున్నాం. పండగ సీజన్ కు తగ్గ అందమైన ఫ్యామిలీ సినిమా ఇది. ‘బొమ్మరిల్లు’ తర్వాత మా బేనర్ కు అంత పేరు తెచ్చి పెట్టే సినిమా ఇది’’ అని దిల్ రాజు తెలిపాడు. సతీశ్ వేగేశ్న దర్శకత్వంలో తెరకెక్కిన ‘శతమానం భవతి’లో శర్వానంద్.. అనుపమ పరమేశ్వరన్ జంటగా నటించారు. ప్రకాష్ రాజ్ కీలక పాత్రధారి. జనవరి 14న ఈ చిత్రం ప్రేక్షకుల ముందుకొస్తుంది. మరి ఖైదీ నెంబర్ 150.. గౌతమీపుత్ర శాతకర్ణి లాంటి భారీ సినిమాలతో పోటీ పడి ఈ సినిమా ఎలాంటి ఫలితాన్ని రాబడుతుందో చూద్దాం.


Like Us on Facebook : https://www.facebook.com/Tupakidotcom/