ఇద్దరు మిత్రులు.. ప్రత్యర్థులవుతున్నారా?

తెలుగులో మరో ఆసక్తికర కాంబినేషన్ కు రంగం సిద్ధమవుతోంది. ‘ఇష్క్’.. ‘మనం’.. ‘24’ లాంటి చిత్రాలతో దర్శకుడిగా తనకంటూ ఒక ప్రత్యేక గుర్తింపు సంపాదించుకున్న విక్రమ్ కుమార్ దర్శకత్వంలో నేచురల్ స్టార్ నాని నటించబోతున్నాడు. మైత్రీ మూవీ మేకర్స్ లాంటి పెద్ద నిర్మాణ సంస్థ ఈ చిత్రాన్ని ప్రొడ్యూస్ చేయబోతోంది. ఈ చిత్రంలో తమిళ కథానాయకుడు సిద్దార్థ్ ప్రతినాయక పాత్ర పోషించబోతున్నట్లు వస్తున్న వార్తలు ఆసక్తి రేకెత్తిస్తున్నాయి.

ఒకప్పుడు ‘బాయ్స్’.. ‘నువ్వొస్తానంటే నేనొద్దంటానా’.. ‘బొమ్మరిల్లు’ లాంటి సినిమాలతో తెలుగు ప్రేక్షకుల మనసు దోచాడు సిద్ధు. ఐతే తర్వాత వరుసగా సినిమాలు బోల్తా కొట్టేయడంతో మార్కెట్ దెబ్బ తినేసింది. కొంత కాలం తర్వాత అడ్రస్ లేకుండా పోయాడు. ఇప్పుడు తమిళంలో కూడా అతడి ఊపు తగ్గింది. చివరగా ‘గృహం’ సినిమాతో తెలుగు ప్రేక్షకుల్ని పలకరించాడు సిద్ధు. అతడికి మంచి ఫ్రెండ్ అయిన నాని ఆ సినిమాను ప్రమోట్ చేసి పెట్టాడు కూడా.

విక్రమ్ కుమార్ చెప్పిన కథలో విలన్ పాత్ర కొత్తగా అనిపించడంతో దానికి తన మిత్రుడు సిద్దార్థ్ అయితే బాగుంటాడని నానినే చెప్పి అతడిని ఈ పాత్రకు ఓకే చేయించాడట. సిద్ధుతో కూడా అతనే మాట్లాడి ఒప్పించాడట. ఈ ఇద్దరు మిత్రులు సినిమాలో ప్రత్యర్థులుగా కనిపిస్తే ఎలా ఉంటుందన్నది ఆసక్తికరం. ‘హలో’తో దెబ్బ తిన్న విక్రమ్.. ఆ తర్వాత అల్లు అర్జున్ తో సినిమా చేయాలని ప్రయత్నించాడు కానీ కుదర్లేదు. తర్వాత నానితో సినిమా కన్ఫమ్ అయింది. డిసెంబర్లోనే ఈ చిత్రం సెట్స్ మీదికి వెళ్లనుంది.