శ్రీను వైట్ల సినిమాలకు బ్రేక్ ఇచ్చేసి..

‘ఆగడు’.. ‘బ్రూస్ లీ’.. ‘మిస్టర్’ సినిమాలతో హ్యాట్రిక్ డిజాస్టర్లు కొట్టేసి బాగా దెబ్బ తిన్నాడు స్టార్ డైరెక్టర్ శ్రీను వైట్ల. దీంతో అతడిపై ఇండస్ట్రీ జనాలకు నమ్మకం పోయింది. ఒకప్పుడు వైట్లతో సినిమా చేసే అవకాశం కోసం చూసిన స్టార్లందరూ ఇప్పుడతడికి ముఖం చాటేస్తున్నారు. చివరికి వైట్ల మిత్రుడు రవితేజ అతడితో ఓ సినిమా చేయబోతున్నట్లు.. ఈ సినిమా అతి త్వరలోనే మొదలు కానున్నట్లు ప్రచారం జరిగింది. తీరా చూస్తే ఆ సినిమా కూడా అనుమానమే అంటున్నారు. ఇలాంటి తరుణంలో వైట్ల పరిస్థితి ఏంటా అని చూస్తుంటే.. అతను సినిమాలు పక్కన పెట్టేసి వేరే రూట్లోకి వెళ్లబోతున్నట్లుగా వార్తలు వినిపిస్తున్నాయి.

ఇప్పుడు వెబ్ సిరీస్ బాగా పాపులర్ అవుతుండటంతో వైట్ల కూడా ఆ బాటలోనే సాగనున్నట్లు చెబుతున్నారు. ఓ ప్రముఖ నిర్మాణ సంస్థ వైట్లతో కలిసి వెబ్ సిరీస్ చేయడానికి ప్లాన్ చేసిందట. కామెడీ మీద మంచి పట్టున్న వైట్లతో ఓ ఫన్నీ వెబ్ సిరీస్ చేయడానికి రంగం సిద్ధం చేసిందట. కొంచెం పేరున్న నటీనటులతోనే ఈ వెబ్ సిరీస్ తీయబోతున్నారట. అలాగే కొన్నాళ్లుగా సైలెంటుగా ఉంటూ మళ్లీ సినిమాల్లోకి రీఎంట్రీ ఇవ్వాలని భావిస్తున్న ఓ నిర్మాత కూడా వైట్లతో ఓ వెబ్ సిరీస్ చేయడానికి ముందుకొచ్చిందట. ఫిలిం కెరీర్ అయోమయ స్థితికి చేరుకున్న సమయంలో వైట్ల లాంటి సీనియర్ దర్శకుడు వెబ్ సిరీస్ బాట పట్టడం చిత్రమైన విషయమే. మరి ఇందులో అతనేమేరకు సక్సెస్ అవుతాడో చూద్దాం.